Талғар ауданында Мичурин бағының іргетасын қалаудың салтанатты рәсімі өтті

Алматы облысының Талғар ауданында «Мичурин бағының» іргетасын қалауға арналған салтанатты рәсім өтті.

Интенсивті бақ шаруашылығын дамытуға бағытталған  халықаралық жобаны ҚР Президенті жанындағы Ұлттық ғылым академиясы мен Ресей ғылым академиясының ғалымдары бірлесіп жүзеге асырды. Қазақ жеміс-көкөніс ғылыми-зерттеу институтының Талғар филиалы базасында ашылған «Мичурин бағы» аграрлық сектордағы ғылыми-білім беру әлеуетін нығайтуға, отандық селекциялық бақ шаруашылығын дамытуға және өңірдің азық-түлік қауіпсіздігін арттыруға бағытталған маңызды қадам болмақ.

Көршілес екі елдің Ұлттық ғылым академиясы бірлесіп жүзеге асырған «Мичурин бағының» аумағы үш гектар жерді алып жатыр. Алмалы ауылындағы бұл көпфункционалды бірегей алаңда алдағы уақытта алма, жүзім, алхоры, шие, таңқурай егіліп, биоресурстық коллекция мен дақылдардың генетикалық қорын кеңейтуге және жеміс-жидек дақылдарының жаңа, болашағы бар сорттарын зерттеп, бейімдеуге арналған ғылыми жұмыстар жүргізіледі.

Ақылбек Күрішбаев, ҚР ҰҒА Президенті:

- Енді болашақта бұл бақ, бұл жердегі өсімдіктер бұл генофонд ретінде қолданылады, яғни жаңа сорт шығарамыз. Ресейдің сорттары өте жақсы, олар енді ең заманауи сорттарын бізге әкеліп отыр. Сондықтан жаңа гибридпен сорт шығаруға бұл бізге өте керек.

Елімізде 35 мың гектарға жуық алма бағы бар. Алайда алынған өнімді сақтайтын қоймалар аз. Мемлекет басшысы үкіметке аграрлық шикізаттың 70 процентін қайта өңдейтін дәрежеге жеткізу туралы тапсырма берген болатын. Ол үшін бізге терең өңдеуге арналған сорттар қажет.

Сәуле Қазыбаева, Қазақ жеміс-көкөніс ҒЗИ басқарма төрағасының орынбасары:

 - Әрине біз өзімізді, Қазақстанды 25 процентке қамтамасыз ете аламыз. Қалғанының көбін шетелден әкеледі. Бүгін енді бізге бір гектарға арналған көшеттер әкелді. Болашақта біз үш гектарға дейін жеткіземіз деген ойымыз бар. 

«Мичурин бағына» көршілес Ресейден әкелінген алғашқы ағаш көшеттері егілді. Мұнда жоғары тауарлық өнім алуға мүмкіндік беретін интенсивті технологиялар қолданылады. «Бұл жай ғана ғылыми жоба емес — бұл Қазақстанның жеміс шаруашылығы саласын дамытуға жасалған ұзақ мерзімді инвестиция, деді ҚР Ұлттық ғылым академиясының президенті Ақылбек Күрішбаев. 

Ардақ Айбарұлы, Аят Дүйсенбаев, Аманжол Жөңкешов