Танымал мектеп директоры Оқу ағарту министріне шұғыл үндеу жасады (ВИДЕО)

Оқу-ағарту министрі Жұлдыз Сүлейменова мұғалімдерді аттестациялау тәртібіне өзгерістер енгізілетінін мәлімдеді. Бұл туралы ол елордада өткен орталық мемлекеттік органдар мен ауыл әкімдерінің диалог алаңында айтты, деп хабарлайды Arasha.kz.

Кездесу барысында педагогтер тарапынан магистратураны тәмамдаған мұғалімдерге біліктілік санатын автоматты түрде беру жөнінде ұсыныс көтерілген. Алайда министр бұл бастаманы қолдамайтынын ашық жеткізді.

"Магистратура бітіргені үшін мұғалімге бірден біліктілік санатын беру дұрыс емес. Орта білім беру жүйесінде педагогтің кәсіби деңгейі ең алдымен оның сабақ беру сапасы мен тәжірибесі арқылы бағалануы тиіс", – деді Жұлдыз Сүлейменова.

Сондай-ақ министр соңғы уақытта қоғамда қызу талқыланып жүрген педагог-зерттеушілердің авторлық бағдарламаларына қатысты да пікір білдіріп, аттестаттау қағидалары педагогтер қауымының ұсыныстарын ескере отырып қайта қаралып жатқанын атап өтті.

Жиын барысында ауылдық елді мекендердегі шағын жинақты мектептерді қолдауға бағытталған нақты шаралар қолға алынатыны айтылды. Білім сапасын арттыру, кадр тарту және мұғалімдерді қолдау бойынша жаңа бастамалар жүзеге аспақ.

Ал танымал мектеп директоры Ақмоншақ Нұртазақызы әлеуметтік желідегі парақшасында министрдің аттестация мәселесіне қатысты жауабын алдағы видеода жариялайтынын хабарлап, жұртшылықты пікір білдіруге шақырды.

Желі қолданушылары бұл мәселеге қатысты екіге жарылды. Бірі мұғалімнің деңгейі дипломмен емес, нақты еңбегімен бағалануы керек десе, енді бірі магистратурада оқыған ұстаздардың еңбегі ескеріліп, біліктілік алу жолы жеңілдетілуі тиіс екенін алға тартты. Кей пікір иелері ғылыми дәрежесі бар, бірақ тәжірибесі аз мамандардың мектепке келуі дұрыс емес деген уәж айтты.

Қазіргі таңда Қазақстанда 600 мыңға жуық педагог еңбек етеді. Сондықтан аттестаттау талаптарына енгізілетін кез келген өзгеріс бүкіл мұғалімдер қауымына тікелей әсер ететіні анық.