Таразда коммуналдық қызметкерлер ереуілге шықты

Тараз қаласында «Жасыл Ел-Тараз» кәсіпорнының қызметкерлері мен Халықты жұмыспен қамту орталығы арқылы қоғамдық жұмысқа тартылған адамдар ереуіл ұйымдастырды, деп хабарлайды Arasha.kz.

Бастапқыда ереуілдің себебі жалақының төмендігі мен зейнетақы қоры мен ӘМСҚ-ға аударымдардың уақытылы жасалмауы екені хабарланған. Ереуілшілермен кездесуге Тараз қаласы әкімінің орынбасары Нұрсұлтан Исабеков шықты.

«Жалақыны көтеру мәселесін әкімдік қарастырып жатыр, қаржылық жағы облыс басшылығымен келісілді. Келесі жылдан бастап штаттық қызметкерлердің еңбекақысы 20%-ға артады.
Халықты жұмыспен қамту орталығы арқылы келген қоғамдық жұмысшылардың да еңбекақысы өседі. Қазір 80–85 мың теңге алатындар барлық аударымдардан кейін 150 мың теңге алатын болады», — деді Исабеков.

Оның айтуынша, егер қызметкерлер жалақысын уақтылы алып отырса, бухгалтерия міндетті аударымдарды жасамауы мүмкін емес.

Алайда кейін белгілі болғандай, ереуілдің себебі тек еңбек жағдайына наразылық емес, сонымен бірге әріптестерінің тағдырына алаңдаушылық болған. Кәсіпорын басшылығының түсіндіруінше, бір учаске бастығына қатысты қызметтік міндеттерін орындауда заң бұзушылықтар болған деген күдік туындаған.

«Азаматшаға қатысты мекеме құқық қорғау органдарына тексеру жүргізіп, шара қабылдау туралы өтініш жолдады. Қазір қорытынды жасауға ерте, шешім тексеру нәтижесінде қабылданады және оның қорытындысы барлық қызметкерлерге хабарланады», — деді мекеме өкілдері.

Жиналғандарды тыныштандыру мақсатында басшылық қызметкердің әзірге жұмыстан шығарылмағанын ресми түрде мәлімдеді.