Коммуналдық қызметкерлер алматылықтарды ықтимал төтенше жағдайлар туралы ескертті

Алматыда 14 және 15 шілдеде жылу желілеріне гидравликалық сынақ жүргізіледі, деп хабарлайды Tengrinews.kz тілшісі "Алматы жылу жүйесі" ЖШС сілтеме жасап.

Алматыда жылу желілерін сынау жұмыстары қай жерлерде өтеді?

14 шілдеде Алмалы мен Жетісу аудандары аумағында Райымбек даңғылы – Бродский көшесі – Рысқұлов даңғылы – Сейфуллин даңғылы шаршысында жылу желілеріне гидравликалық сынақ жүргізіледі.

Сондай-ақ 15 шілдеде Алатау және Жетісу аудандары аумағында Яблочков – Азовская – Рысқұлов – Серіков – Ратушный – Ангарская көшелері – ҮАААЖ – Момышұлы – Аққайнар, Мөңке би, Боралдай кенттері аумағында сынақ өтеді.

"Магистральдық және тарату құбырларын тексеру кезінде, таңғы сағат 04:00-ден 07:00-ге дейін қала тұрғындары мен мегаполис қонақтарына қауіпсіздік шараларын сақтау ұсынылады. Қабылданып жатқан қауіпсіздік шараларына қарамастан, судың жер бетіне шығуы, жол жабынының ішінара бұзылуы сынды штаттан тыс жағдайлар болуы мүмкін", - деп нақтылады "Алматы жылу жүйесі" ЖШС.

Компания тұрғындарды жылу желілерінің зақымдану белгілері анықталған жағдайда өз бетінше әрекет етпеуге, оқиға орнынан дереу кетіп, бұл туралы 109 нөміріне хабарлауға шақырды.

Анықтама. Сондай-ақ 351-27-62 нөміріне, 341-07-00 немесе 341-07-77 (ішкі 1011 немесе 1014) байланыс орталығына хабарласуға болады.

Сонымен қатар ұйым аталған аумақтарда тұратын барлық тұтынушыға ыстық су беру толық сақталатынын хабарлады.

Компания гидравликалық сынақ жылу желілері мен жабдықтардың жай-күйін тексеру, құбырлардың проблемалы учаскелерін анықтау, сондай-ақ қаланың жылу шаруашылығын алдағы жылу беру маусымына дайындау үшін жүргізілетінін түсіндірді. Тұрғындардан уақытша қолайсыздықтарға түсіністікпен қарау сұралды.

ҚАЗІР ТАЛҚЫЛАНЫП ЖАТЫР

10 күнде 760 келі есірткі: ІІМ ауқымды операцияның мән-жайын ашты

Бүгін 08:56 1

Тағы оқыңыз: Алматының қай аудандарында жарық өшіріледі: мекенжайлар тізімі