Таразда көп қабатты үйлердің ауласы қараусыз қалған

Таразда көп қабатты үйлердің ауласы жылдар бойы қараусыз қалған.

Қазір шаһардағы 700-ге жуық ауланың 30 пайызы тозып тұр. Ал кейбір ойын алаңдары кеңестік кезеңнен бері жөндеу көрмеген. Салдарынан балалар ойнауы тиіс аумақтар қауіпті бетон мен ескі темір-терсекке толыпты. Ал әкімдік оларды жаппай жаңарта алмай отыр. Тек жылда 20-ға жуық ауланы абаттандырмақ.

Мерей Бает, тілші: 

- Массив Қарасу шағын ауданындағы мына көп қабатты баспаналар 1986 жылы салынған. Алдындағы мына бетон конструкциялар да сол жылы бой көтеріпті. Содан бері аула, ойын алаңшасы мүлде жөндеу көрмеген. Тіпті жауаптылар оларды сырлауды да ұмыт қалдырғандай.

Ата-аналар баласын аулаға ойнатудан қалған. Тұрғындар бірнеше жылдан бері жауапты мекемелерге шағым айтқанымен, нәтиже жоқ.

Гүлзипа Ибрагимова, қала тұрғыны: 

- 2000 жылы келдім сол бойы тұр. Не крастетілген жоқ. Не құм да төселмейді. Мына цемент те даже сол кездегі асфальт. Бәрі бетонменен қалың бір темірлерменен. Бұл темірдің барлығы мына кішкентай балаларға өте қауіпті. Неше бала құлап жатыр. Неше бала жылап жарақат алып жатыр. 

Мәселе бір ғана ауламен шектелмейді. Қалада 1500-ге жуық көп қабатты үйдің 30 пайызының ойын алаңы дәл осындай кейіпте. Жұрт үй ауласындағы жаңғырту жұмысын күте –күте күдер үзген. 

Қарлығаш Әуезова, қала тұрғыны: 

- Бес баланың анасымын. Олар бұл жерде ойнауға мүмкіндік болған жоқ. 2016 дан бастап осы жерде тұрамыз. ЖКХ-ны күтіп жүргенімізге 2 жыл болды. Ол қашан ремонтталады. Қашан бұл жаңарады. Оны білмейміз. 

Ал қала билігі аулалардың бәрін бірден абаттандыру мүмкін емес, дейді. Өйткені оған ең алдымен қомақты қаржы қажет. Тұрғындардың салғыртығы да бұл іске қолбайлау. Дегенмен, 2024  жылы қала бюджетінен 500 млн теңге бөлініп 24 аула, ал былтыр 768 млн теңге қаржыға 25 ойын алаңын абаттандырылды. 

Шыңғыс Ерғараев, Әулиеата ауданы әкімінің орынбасары:

- Өзіміздің есеп бойынша 20-30 пайызы тозу деңгейі анықталуда. Өйткені бізге дейін 2018 де, 2015 те, 2020 да оған дейін салынған үйлердің аулалары, балалар ойын алаңшасы мен футбол алаңшаларының тозу деңгейі байқалуда. Енді біз тұрғындармен де жұмыс жасап жатырмыз. Кішкене ұқыптылықпен қарау бойынша тұрғындарға түсіндіру жұмыстары жүргізілуде. 

Қала билігі биыл тек 16 үй ауласына, футбол және балалар алаңын салатынын мәлімдеді. Ал мәселесін айтқан Массив Қарасу шағын ауданы бұл тізімнен тыс қалған. Сондықтан тозған аулалар мәселесі жуық арада шешімін табарына сенбейміз дейді тұрғындар. 

Мерей Бает, Тимур Сейілхан, Елдар Байділдә