Ташкенттің ауа сапасы нашарлаған

Әлемнің ірі қалаларында ауа сапасын нақты уақыт режимінде бақылайтын Швецарияның «IQ Air» компаниясының дерегінше Ташкент ауа сапасы нашар қалалардың алғашқы ондығында тұр.

Яғни шаһарда тыныстау адам денсаулығына зиян. Үштікте Үндістанның Делиі мен Калькуттасы, Мысырдың Каир қаласы бар. Өзбек билігі бас шаһардағы ауа сапасын жақсарту үшін түрлі жобаны қолға алғанымен әзір нәтиже жоқ.

Дулат Нуркин, тілші:

- Ташкентте ресми 3 млн жуық тұрғын бар ал айналасындағы агломерацияда 5 жарым млн адам өмір сүреді. Соңғы жылдары көне шаһарда салынып жатқан нысандар көбейген. Салдарынан жел соқпайтын болған. Шаң-тозаң төбеде қалықтап тұрады. Бір қарағанда тұман сияқты көрінуі мүмкін. Биыл жауын-шашын да аз түсті. Ол да кесірін тигізіп жатыр. Одан бөлек шаруалар жылыжайларын жылыту үшін көмір жағып, ауаны ластайды. Экологиялық жағдайдан билік хабардар. Президент жанынан арнайы комиссия да құрылып, рейдттер өткізіп, құрылыс нысандары мен жылыжайлар нысанаға ілінген. Алайда жағдай мұнымен шешілген жоқ. Ауа сапасын бақылайтын әлемдік рейтингте Ташкент әлі күнге дейін экологиясы нашар шаһарлардың ондығында тұр. Мәселен, бүгінгі ауа сапасы тиісті нормадан 13 есе асқан. Қоғамдық белсенділер болса, экологиялық жағдай тек табиғи жолмен шешілуі мүмкін, көп жауын жауса, ауадағы шаң-тозаң басылады  деген болжам айтады. Ал екінші жолы - барлық құрылыс нысандары мен жылыжайлар жұмысын тоқтату. Егер соңғысын жасайтын болса, әлбетте экономикаға зор шығын келетіні белгілі. Соған қарағанда Ташкенттің ауа сапасы жуық арада жақсарады дегенге көпшілік сенбейді. Бұл өз кезегінде шаһардың халықаралық имиджіне де кері әсерін тигізері анық.

Дулат Нуркин