Таза Қазақстан: Жамбыл облысында тұрғындар telegram боттан хабарсыз

Жамбыл облысында «Таза Қазақстан» акциясы аясында жұмысын бастаған телеграмм-боттан тұрғындар хабарсыз. Ақпараттық сервиске 2024 жылы 400 өтініш түссе, 2025-жылы мыңға жетер-жетпес хабарлама келген. 

Бұл облыс тұрғындарының 1 процентін де қамтымайды. «Жалпы өтінішпен түскен қоқыс жиналғанымен, құрылыс жұмыстарын қажет ететін олқылықтар ескерілмейді», - дейді қала тұрғындары. 

«Таза Қазақстан» акциясы аясында экологиялық мәселелерді шешу үшін аймақта 2024 жылы telegram-бот жобасы бастаған еді. Оның жұмысын облыстық энергетика басқармасы жүргізеді. Чатқа түскен халық шағымы өтінім ретінде тіркеліп, ары қарай жауапты мекемелерге жолданады. Ал оны шешу үшін жұмыс жүктемесіне қарай үш күннен екі аптаға дейін уақыт беріледі.

Сержан Саржанов, облыстық Энергетика және коммуналдық шаруашылық басқармасы басшысының міндетін атқарушы:

- Порталында 24 санақ қарастырылған санитарлық тазалық бойынша кез келген мобильді қондырғымен өтінім білдіре алады. Сол сәттен бастап бізге келіп түседі. Біз оператор ретінде жергілікті атқарушы органдарға аударамыз. Жергілікті атқарушы орган мониторына келген сәттен бастап тез арада жоюға тырысады. Сонымен қатар фото есеп ретінде сол тазаланған нысанды суретке түсіріп, өтінім білдірушіге телефон шалып, қанағаттанатын немесе қанағаттанбайтын жағдайын айқындайды.

Ақпараттық сервисті белсенді қолданушының бірі – Анастасия Ивлева. Тұрғын тазаланбаған қоқыс, тұрмыстық және құрылыс қалдықтарын көрсе, бірден telegram-ботқа жүгінеді. Дегенмен жауаптылардың жұмысына көңілі толмайды. Себебі тазалыққа жауаптылар жеңіл қоқысты тазалағанымен ескірген үй-жай, аула мен жол мәселесіне келгенде елеусіз қалдырады екен. 

Анастасия Ивлева, қала тұрғыны:

- Тelegram -ботты пайдаланып жүргеніме бір жылдан асты. Біздің көпқабатты үйде ПИК бар. Олар үйге қатысты кішігірім жұмыстарды ғана атқарады. Алайда шағын ауданның тазалығына ешкім жауапты емес. Үйдердің ауласы қалдыққа толып жатады. Сондықтан соның бәрін telegram-ботқа жүктеп отырамын. Кейде келіп сол маңды ғана тазалап кетеді. Десе де балалар алаңын жөндеу, жаңа салынған асфальттың бұзылған тұсын қайта қалпына келтіру деген жұмыстар мүлде істелмейді. 

Жалпы бір жыл ішінде telegram-ботқа 900-ден аса өтінім түскен. Аймақта 1 миллионнан аса халықтың тұратынын ескерсек, бұл тым аз көрсеткіш. Сондықтан жұрттың ақпараттық сервистен хабары бар жоғын білу үшін сұрап көрдік.