Темір өндіретін зауыт салынады

Рудныйда «ERG» мен Аустрияның «Primetals Technologies Austria GmbH», АҚШ-тың «Midrex Technologies Inc.» компаниялары Рудныйда ыстық брикеттелген темір өндіретін зауыт салу жөнінде стратегиялық келісімшарт жасасты. Келісім аясында зауытқа қажет тұтас инжиниринг пен негізгі технологиялық жабдықтарды жеткізу көзделіп отыр.

Аталған зауыт келешекте Орталық Азиядағы ең ірі жаңа ­буынды «жасыл» металлургиялық нысанның біріне айналмақ. Мұнда металдығы 93%, құра­мын­дағы темір үлесі 90%-дан жо­­ғары өнім алу көзделген. Нә­ти­же­сінде, еліміз жаһандық бо­лат құю нарығында бәсекеге қабі­летті өнімнің жаңа түрін ұсына­тын болады.

Жобаны «Midrex» үдерісі бо­йынша темірді тікелей қалпына келтірудің озық технологияларына сүйене отырып іске асыру жоспарланған. Мамандар аталған технология экологиялық тұрғыдан бұған дейінгі дәстүрлі домна өндірісінен анағұрлым ұтымды екенін айтады. Мұнда кокстың орнына табиғи газ пайдаланылады. Зауыт «ССКӨБ» АҚ өндірген тотыққан теміркені ше­кемтастарын өңдеп, бола­шақ болат құю цехына ыстық биркеттелген өнім беріп отырады.

«Мемлекет басшысының Жолдауында терең өңделген және отандық, халықаралық нарықта бәсекеге қабілетті өнім өндіру – басым бағыттың бірі екені айтылды. Бүгін осы консорциуммен жасалған келісімшарт – еліміздегі металлургия саласын дамыту мен ондағы «ERG»-дің көшбасшылығын нығайта түсетін стратегиялық қадам. Біз экспортқа жаңа мүмкіндіктер ашатын, жаңа жұмыс орындарын құрып, кәсіби білікті адам капиталына сеп болар жоғары технологиялық өндіріс құрып жатырмыз», деді «ERG» директорлар кеңесінің төрағасы, бас атқарушы директоры Шухрат Ибрагимов.

Ыстық брикеттелген темір өндіру зауыты жобасын Еура­зиялық топтың еншілес кәсіпорны «QazIron ERG» ЖШС іске асырады. Зауыт жылына 2 млн тонна өнім өндіреді деп жоспарланып отыр. Жобаға құйылатын жалпы инвестиция көлемі – 655 млрд теңге. Шамамен бір мыңнан астам адамды жұмыспен қамтамасыз ететін өндіріс орны 2029 жылы іске қосылмақ.

«Бұл – Қазақстан үшін метал­лургия саласындағы жаңа дәуірдің бастауы болатын ауқымды жоба. Ол «ERG»-дің әлем­дік нарықтағы позицияларын нығайтуға септеседі. Осындай маңызды қадамға атсалысу – бізге үлкен мәртебе. «MIDREX Flex» шешімдері – кеннен темір өндірудің ең экологиялық таза технологиясы екенін атап өту керек. Дәстүрлі әдіспен салыстырар болсақ, жаңа технология өндіріс барысында бөлініп шығатын көміртегі қышқылының көлемін 50% төмендетеді», деді «Primetals Technologies» компаниясының вице-президенті әрі жаһандық «Upstream» құрылымының жетекшісі Андреас Вихбек.

Ресми жиынға өңір басшысы Құмар Ақсақалов қатысып, шетелдік компания өкілдеріне өңір экономикасы дамуының бағыт-бағдарын аңдатты.

«Жолдауда Мемлекет басшысы нақты міндеттер – жаңа буынның өнеркәсібін дамытуды, экологиялық таза технологияларды енгізіп, сапалы жаңа жұмыс орындарын ашуды қадап тапсырды. Рудный қаласында ыстық брикеттелген темір өндіретін за­уыт жобасы – осы тапсырмаларды іске асырудың жарқын мысалы. Заманауи өндіріс ошағы облыс экономикасының өрісін кеңейтіп, жаңа жұмыс орындарының ашылуына, аймақта жаңа индустриал­ды экожүйе қалыптастыруға тұ­ғыр болады», деді облыс әкімі.

«Midrex» президенті К.Вудидің айтуынша, аталған компания әлемде ыстық брикеттелген темір өндірісі бойынша көшбасшы саналады. Бүгінде бұл саладағы жаһандық нарықтың 90%-ы осы компанияның енші­сінде. Компания соңғы 50 жыл ішінде әлемнің 21 елінде 100-ден астам қондырғы орнатқан.

Қостанай облысы