Тимофей Скатов Швейцариядағы турнирдің екінші айналымына өтті

Жарыстың 7-ракеткасы болып тіркелген Т.Скатов бастапқы кездесуін рейтингіде 247-орындағы германиялық Том Генчпен өткізді.

Бірінші партияда 3:1 есебімен алға шыққан қазақстандық спортшы сол басымдылығынан айырылған жоқ – 6:3. Екінші сетте есеп 5:5 болған сәтте Скатов брейк жасай алды – 7:5.

Бір сағат 29 минутқа созылған бәсекеде Скатов 7 эйспен бірге 4 брейк-пойнттың тең жартысын өз пайдасына жазды. Генч 4 эйсті қанағат тұтты.

Тимофей Скатов ширек финалға шығу үшін әлемнің 230-ракеткасы, хорватиялық Матей Додиг немесе рейтингіде 360-сатыдағы чехиялық Йонас Форейтектің қай жеңгенімен таласады. 

Лугано додасының жүлде қоры 97 640 еуроға бағаланған. Жеңімпаз 15 510 еуроға қоса 75 рейтингілік ұпайға қол жеткізеді. 

Т.Скатов дүйсенбіде жаңартылған ATP рейтингісінде 195-тен 192-ге көтерілді. 

Еске сала кетейік, бұдан бұрын Анна Данилинаның әлемдік рейтингіде өзінің рекордын қайта жаңартқанын жазған едік.

Сондай-ақ Александр Бублик жұптық сында Дубайдағы турнирдің ширек финалына шықты.