Тимур Құлыбаевтың Каспий нефть компаниясын сату жөніндегі келісімі әлі аяқталған жоқ

Кәсіпкер Тимур Құлыбаевқа тиесілі «Каспий нефть» АҚ-ның сату келісімі әлі аяқталған жоқ. Сарапшылар бұған дейін мәміле жақын арада түйінделеді деп болжаған еді, алайда ол әлі жүзеге аспады.

Қазіргі таңда «Каспий нефть» АҚ-ның барлық 100 мың акциясы толықтай «Joint Resources» компаниясының меншігінде қалып отыр. Бұл компанияның жалғыз иесі — Тимур Құлыбаевтың өзі.

Құлыбаев активті сатуға дайындалуда

Бұған дейін Атырау облысында өңірдегі ірі мұнай компанияларының бірі — «Каспий нефть» сатылуы мүмкін деген ақпарат тараған еді. Компания Жылыой ауданындағы Айранкөл кен орнында жұмыс істейді және соңғы отыз жылға жуық уақыт бойы Қазақстанның мұнай-газ саласында маңызды орын алып келеді.

1997 жылы құрылған бұл кәсіпорын осы уақыт аралығында кен орнын игеруге және инфрақұрылымды дамытуға он миллиардтаған теңге инвестиция салған. 2023 жылы компанияның кірісі 186 млрд теңге болса, 2024 жылы таза пайдасы 33,5 млрд теңгеге дейін төмендеген. Сарапшылар мұны әлемдік мұнай нарығындағы өзгерістермен және уақытша өндіріс көлемінің азаюымен байланыстырады.

Экологтармен дау және инвестордың үміті

2024 жылы компания экологиялық талаптарды бұзды деген айыппен бақылаушы органдардың назарына ілікті. Атырау облысының экология департаменті «Каспий нефтьке» «қажетті экологиялық рұқсатсыз шығарындылар тастағаны үшін» 13,6 млрд теңге көлемінде айыппұл салған. Компания бұл шешіммен келіспей, шағым түсірген.

Құлыбаев активті сату мүмкіндігін әлі де қарастырып жатыр. Алайда компания басшылығынан ресми түсініктеме әзірге берілген жоқ. Бірқатар БАҚ мәліметінше, ықтимал инвестор табылған, бірақ келіссөздер әлі жалғасуда.

Компанияның әлеуметтік маңызы

«Каспий нефть» — Жылыой ауданының негізгі жұмыс берушілерінің бірі. Компания жүздеген жергілікті тұрғынды жұмыспен қамтып отыр, аймақ бюджетін толықтырып, әлеуметтік жобаларды қаржыландырады. Сондықтан да кәсіпорынның болашағы жергілікті халықтың ерекше назарында.

Тұрғындар жаңа иесі кім болатынын және қазіргі әлеуметтік саясат сақтала ма, соны білгісі келеді.

Қазіргі уақытта жағдай белгісіз қалып отыр. Акционерлер мен инвесторлар ресми мәлімдеме жасаудан тартынуда, ал жұртшылықі ресми түсініктеме күтіп отыр.

Айгүл Мансурова

Бүгін, 13:53