Тоқаев ЕАЭО елдерін жасанды интеллектіні дамытуға басымдық беруге шақырды

Мемлекет басшысы Қасым-Жомарт Тоқаев V Еуразиялық экономикалық форумның пленарлық сессиясында сөз сөйлеп, Еуразиялық экономикалық одақ елдерін жасанды интеллектіні дамыту мен оны экономиканың негізгі тетігіне айналдыруға шақырды.

Биылғы форум «Жаһандық цифрлық бәсекедегі ЕАЭО: жасанды интеллектіге басымдық беру» тақырыбына арналды.

Президент форумға қатысу үшін Астанаға келген ЕАЭО-ға мүше мемлекеттердің басшылары мен делегация жетекшілеріне алғыс білдіріп, жасанды интеллектінің әлемдік экономикаға ықпалы артып келе жатқанын айтты.

«Халықаралық сарапшылардың бағалауынша, алдағы он жылда жасанды интеллектіні қолдану әлемдік ішкі жалпы өнімнің өсімін шамамен 7 триллион долларға жеткізуі мүмкін. Бұл жаңа технологиялық дәуірдің қалыптасуына жол ашады және экономиканың барлық секторындағы еңбек нарығының құрылымын түбегейлі өзгертеді», – деді Мемлекет басшысы.

Президенттің айтуынша, Халықаралық валюта қорының бағалауына сәйкес, алдағы жылдары жасанды интеллект технологияларын енгізу нәтижесінде әлемдегі жұмыс орындарының 40 пайызға дейін қысқару қаупі бар. Сондықтан миллиондаған адам жаңа білім мен дағдыларды меңгеруге мәжбүр болады.

Мемлекет басшысы бұл үрдіс ұлттық білім беру жүйелеріне де үлкен өзгеріс әкелетінін атап өтті.

«Цифрлық технологияларды қарқынды экономикалық және қоғамдық даму тетігіне айналдыра аламыз ба – ең басты мәселе осы. Амбициясы бар мемлекеттердің болашағы осы міндетті қаншалықты тиімді шеше алуына байланысты», – деді Тоқаев.

Осыған байланысты Қазақстан Еуразиялық экономикалық одақ органдарына төрағалық еткен кезеңде жасанды интеллект технологияларын Одақ аясындағы «төрт еркіндік» қағидатын іске асыру құралы ретінде қолдануды ұсынған.

Форумға Ресей Президенті Владимир Путин, Беларусь Президенті Александр Лукашенко, Қырғызстан Президенті Садыр Жапаров, Армения вице-премьері Мгер Григорян, Куба вице-президенті Сальвадор Вальдес Меса, Вьетнам Премьер-министрінің орынбасары Хо Куок Зунг, Моңғолия Премьер-министрінің орынбасары Нямтайширын Номтойбаяр, Еуразиялық экономикалық комиссия алқасының төрағасы Бақытжан Сағынтаев және басқа да ресми тұлғалар қатысты.