Трамп Иранмен сауда жасайтын елдерге тарифті көтеру туралы жарлыққа қол қойды

АҚШ президенті Дональд Трамп Иранмен сауда-саттықты жалғастырып отырған елдерден келетін импортқа кедендік тарифтер мөлшерлемесін көтеруге жол беретін жарлыққа қол қойды, деп хабарлайды Arasha.kz.

Құжатта баж салығының нақты көлемі көрсетілмеген, бірақ оны қолдану принципі сипатталған. Мысал ретінде: «Осы жарлық күшіне енген күннен бастап, Ираннан кез келген тауарларды немесе қызметтерді тікелей немесе жанама түрде сатып алатын, импорттайтын немесе өзге де жолдармен иемденетін кез келген елде өндірілген және АҚШ-қа импортталатын тауарларға қосымша адвалорлық баж мөлшерлемесі — мысалы, 25% — салынуы мүмкін» делінген.

Трамп дәл осы 25% деңгейін 12 қаңтарда Truth Social сайтындағы жазбасында атап өткен болатын.

 «Президент Иранды ядролық мүмкіндіктерге ұмтылғаны, терроризмді қолдағаны, баллистикалық зымырандарды әзірлегені және АҚШ-тың қауіпсіздігіне, одақтастарына және мүдделеріне қауіп төндіретін аймақтық тұрақсыздық тудырғаны үшін жауапты деп санайды», — деп көрсетілген.

Иран Вашингтонның бұл жаңа қадамына қатысты әлі пікір білдірген жоқ.

Иран экспортының негізгі бабы — шикі мұнай. Reuters агенттігі Kpler сараптамалық компаниясының деректеріне сілтеме жасай отырып хабарлағандай, Иран жеткізілімдерінің шамамен 80%-ы Қытайға бағытталады. Қытайдың кедендік статистикасында 2022 жылдан бері Ираннан тікелей мұнай жеткізілімі тіркелмеген, бірақ сарапшылар мұны шикізаттың үшінші елдерде қайта тиеліп, Малайзия немесе Индонезия тауары ретінде ресімделуімен түсіндіреді.

Трамптың өзі жарлыққа тікелей түсініктеме берген жоқ, бірақ ұшақта журналистермен сөйлесу кезінде Тегеранға қатысты ұстанымын тағы да қайталады: «Ешқандай ядролық қару болмайды».

Жұма күні Оманда Иран мен АҚШ арасында келіссөздер өтті, оның алдында бірнеше апта бойы екі тарап бір-біріне қоқан-лоқы көрсеткен болатын. Иран делегациясының басшысы, Сыртқы істер министрі Аббас Арагчи кездесуді «жақсы бастама» деп атап, «позитивті атмосфераны» атап өтті. Трамп сол күні кешке келіссөздердің «өте жақсы» өткенін айтты. АҚШ тарапынан кездесуге арнайы өкіл Стив Уиткофф пен президенттің күйеу баласы Джаред Кушнер қатысты.