Трамп пен Ли не туралы келісті: суасты қайықтарына арналған отын және 350 млрд долларлық инвестиция

Мұндай мәлімдеме Ли мен Трамптың оңтүстіккореялық Кёнджу қаласында өткен екіжақты саммиті кезінде жасалды. Сеул ядролық энергетика саласындағы екіжақты келісімді қайта қарауға ниетті. Бұл елге пайдаланылған ядролық отынды қайта өңдеу және уран байыту мәселелерінде көбірек еркіндік береді.

– Сіз атомдық суасты қайықтарына арналған отын жеткізуге мүмкіндік беретін шешім қабылдайсыз деп үміттенемін, – деді Ли Трамптан ядролық отынды қайта өңдеу жөніндегі консультацияларды жеделдетуді тапсырма ретінде беруді сұрап.

Оның айтуынша, дизельді қозғалтқышпен жүретін суасты қайықтардың сүңгу мүмкіндігі шектеулі, бұл Оңтүстік Корея әскерінің Солтүстік Корея мен Қытайдың суасты кемелерін бақылау қабілетін төмендетеді. Сонымен қатар ол бұл өтініштің ядролық қарумен жабдықталған атомдық суасты қайықтар салуға бағытталмағанын ерекше атап өтті.

– Егер отын жеткізуге рұқсат берілсе, біз өз технологиямызды пайдалана отырып, әдеттегі қарумен жабдықталған бірнеше суасты қайық сала аламыз. Бұл Корея түбегі маңындағы суларды қорғауға және АҚШ қарулы күштерінің жүктемесін азайтуға мүмкіндік береді, – деді Ли Чжэ Мен.

Президент сондай-ақ уран байыту және пайдаланылған ядролық отынды қайта өңдеуді реттейтін екіжақты ядролық келісімді қайта қарау жөніндегі келіссөздерді жеделдетуді сұрады.

Қазіргі уақытта Оңтүстік Кореяға уранды 20 пайыздан төмен деңгейде ғана АҚШ келісімімен байытуға рұқсат етілген, ал отынды қайта өңдеуге толық тыйым салынған.

Ли Чжэ Мен екі ел арасындағы одақтастықты жаңғыртып, оны «болашаққа бағытталған жан-жақты стратегиялық альянсқа» айналдыруға ниетті екенін айтты. Ол өз үкіметінің қорғаныс шығындарын арттыру арқылы елдің өзін-өзі қорғау қабілетін күшейтуге бағытталған шаралар қабылдайтынын атап өтті.

– Корея Республикасы қорғаныс саласына шығындарды көбейтіп, әскери өнеркәсіпті дамыта отырып, өз қорғаныс әлеуетін айтарлықтай арттырады. Бұл өз кезегінде АҚШ-тың қорғаныс шығындарын азайтуға мүмкіндік береді, – деді Ли.

Сонымен қатар ол Оңтүстік Кореяның АҚШ-тағы өндіріс пен инвестицияны кеңейтуге бағытталған Трамптың бастамаларын қолдайтынын растады.

– Біз кеме жасау саласындағы ынтымақтастықты белсенді дамытамыз. Бұл екі ел экономикасына да пайда әкеліп, одақтастықты неғұрлым практикалық әрі тұрақты етеді, – деп атап өтті ол.

CNBC дерегінше, келіссөздер қорытындысы бойынша Трамп пен Ли 350 млрд долларлық инвестициялық қор жөнінде уағдаласты. Соның ішінде 200 млрд доллар қолма-қол қаражат түрінде бөлініп, жылына 20 млрд доллардан артық емес мөлшерде кезең-кезеңімен төленеді. Қалған 150 млрд доллар Трамп уәде еткен АҚШ-тағы кеме жасау саласын қалпына келтіруге бағытталады.

Оңтүстіккореялық тараптың хабарлауынша, тараптар бастапқы инвестициялар өтелгенге дейін табысты тең үлеспен бөлуге және тек экономикалық тұрғыдан тиімді жобаларды дамытуға уағдаласты.

Бұған дейін Оңтүстік Корея Дональд Трампқа ежелгі алтын тәждің көшірмесін табыс етті.