Трамптың Ормуз бұғазына қатысты мәлімдемесінен кейін мұнай бағасы 8% ға өсті

АСТАНА, 13 сәуір – Sputnik. Сауда деректеріне сәйкес, АҚШ президенті Дональд Трамп Ормуз бұғазын блокадалау туралы жариялағаннан кейін әлемдік мұнай бағасы 8%-ға өсті, Brent мұнайының бағасы барреліне 102 доллардан асты.

13 сәуірде Астана уақыты бойынша таңғы сағат 3:00-дегі жағдай бойынша маусым айындағы Brent мұнай фьючерстерінің бағасы алдыңғы жабылумен салыстырғанда 7,76%-ға өсіп, барреліне 102,59 долларды құрады, ал мамыр айындағы WTI фьючерстері 8,2%-ға өсіп, 104,51 долларды құрады.

12 сәуірде Трамп АҚШ Ормуз бұғазына кіріп-шығуға тырысатын барлық кемелерді блокадалай бастайтынын жариялады. Сондай-ақ ол АҚШ әскери-теңіз күштеріне бұғаз арқылы өту үшін Иранға ақы төлейтін барлық кемені бақылауды және тежеудә тапсырды.

АҚШ Қарулы күштері орталық қолбасшылығы 13 сәуірде Астана уақыты бойынша сағат 19:00-де "Иран порттарына кіретін және шығатын барлық теңіз трафигін" блокадалауды бастауға уәде берді.

Трамп 8 сәуір түні Тегеранмен екі апталық атысты тоқтату туралы келісімге келгенін жариялағаннан кейін 11 сәуірде Иран мен АҚШ Исламабадта келіссөздер бастады. Жексенбі күні таңертең америкалық делегацияның басшысы, вице-президент Джей Ди Вэнс Иран мен АҚШ ұзақ келіссөздер барысында келісімге келе алмағанын және АҚШ делегациясы келісімсіз елге оралатынын мәлімдеді.