ЕО Трамптың Ормуз бұғазына қатысты бастамасын заңсыз деп атады

Еурокомиссия өкілдерінің айтуынша, халықаралық құқық теңізде еркін жүзу қағидатын қарастырады.

«Халықаралық құқық кеме қатынасының еркіндігін көздейді. Бұл ешқандай төлемдер мен алымдардың болмауын білдіреді», – деді ведомство өкілі.

Сондай-ақ Ормуз бұғазы бүкіл адамзатқа ортақ су жолы екені атап өтілді.

«Ормуз бұғазы кез келген басқа теңіз жолы сияқты – ортақ игілік. Демек, навигация еркін болуы тиіс», – делінген мәлімдемеде.

Бұл реакция Дональд Трамптың АҚШ пен Иран арасында бірлескен механизм құрып, стратегиялық маңызы бар бұғаз арқылы өтетін кемелерден ақы алу ұсынысынан кейін айтылды.

Ақ үйдің баспасөз хатшысы Кэролайн Левитт бұл идея әлі талқыланатынын мәлімдеді.

«Қазіргі басты міндет – кеме қатынасын ешқандай шектеусіз, оның ішінде төлемдерсіз қайта қалпына келтіру», – деді ол.

Қазіргі уақытта Ормуз бұғазындағы жағдай күрделі күйінде қалып отыр. Аймақтағы шиеленіс салдарынан теңіз тасымалына кедергілер туындап, энергия ресурстарының бағасы өскен.

Алдын ала деректер бойынша, Парсы шығанағында шамамен 2000 кеме мен 20 мың теңізші бөгеліп тұр.

Мәліметтерге сәйкес, Иран бұғаз арқылы өтетін әрбір кеме үшін тасымалданатын мұнайдың әр барреліне 1 доллар көлемінде төлем енгізген. Төлем юань немесе криптовалюта арқылы жүргізілуі мүмкін.

Еурокомиссия бұл тәжірибені де заңсыз деп санайды. Себебі БҰҰ-ның теңіз құқығы жөніндегі конвенциясы қарапайым транзит үшін ақы алуға тыйым салады. Төлем тек нақты қызмет көрсетілген жағдайда ғана рұқсат етіледі.

Сонымен қатар Еурокомиссия жеке компаниялардың бұл талаптарды орындау немесе орындамау мәселесін өздері шешетінін атап өтті.

Айта кетейік, ЕО алғаш рет импортқа салынатын көміртек бажының мөлшерін белгіледі.