Туризмдегі жеңілдіктер тәуекелді мойнына алғандарға берілуі тиіс сарапшы

Инна Рейдің айтуынша, елімізде туризмді қолдаудың көп шаралары іске асырылып жатыр. Алайда олар түрлі бағдарламаларға шашырап кеткендіктен, тиімділігін байқай бермейміз.

– Ең қызықты шаралардың бірі – кірмелік туризмін (мемлекет аумағында тұрақты тұрмайтын адамдардың мемлекет шегінде саяхаттауы) субсидиялау. Өйткені шетелдік туристерді тартқаны үшін белгілі бір сома төленеді. Ел экономикасына үлес қосқан әрбір турист бойынша құжаттарды арнайы комиссия қарайды. Бұл жерде туристің келуі тек туроператор үшін емес, жалпы жұртшылық үшін тиімді екенін түсіну керек, - деді сарапшы.

Сонымен қатар ол Қазақстанға мұндай субсидия беру тәсілін қайта қарау қажет деп есептейді.

– Мемлекеттік қолдау ең алдымен елге туристерді тұрақты түрде, тым болмаса маусым кезінде, тіпті жыл бойы үздіксіз тартуды мойнына алғандарға берілуі керек. Өйткені ол жоспарлаған турөнімі толық сатылса да, сатылмаса да, іске ақша тігіп, қаржылық тәуекелге барады. Осындай жағдайда жұмыс істейтін кәсіпкерлерге көмек ауадай қажет, - деп атап өтті Инна Рей.

Сарапшының түсіндіруінше, туристер ағынының тұрақталуы инвесторлар үшін де алдын ала болжам жасауға мүмкіндік береді. Егер кәсіпкерлер өңірге белгілі бір мөлшерде қонақтардың жиі келетініне көзі жетсе, олар инфрақұрылымға, қонақүйлер салуға, қызмет көрсету сапасын жақсартуға қорықпай қаржы салады.

Бұдан бөлек ауыл адамдары да бау-бақшасын егіп, малын бағып, өз өнімдерін өткізетін нарық қалыптасады.

Осылайша, ауыл мен қала арасындағы берік экономикалық байланыс орнайды.

Инна Рейдің пікірінше, жеңілдіктер тек жаппай туризмді қамтамасыз етіп, ұзақ мерзімді жоспармен жұмыс істейтін ірі туроператорларға берілуі тиіс.

Қаражаттың басқа мақсатқа жұмсалуы немесе қолдаудың тек бірді-екілі компанияның қолына өтіп кетуі сияқты қауіп бар. Бұған қатысты сарапшы мұндай процестерді бақылауға алу оңай екенін айтты.

– Бүгінде туризм саласында керемет серпіліс жасаған елдердің барлығы да осындай қолдау тетіктері арқылы өткен. Бұл - әлемдік тәжірибеде бұрыннан бар, сыналған тәсіл, - деп түйіндеді ол. 

Еске сала кетейік, бұған дейін Ақмола облысы туристерге не ұсынатынын жазған едік.