Отандық шикізатты өңдеуде жергілікті кәсіпорындарға басымдық берілуі тиіс

- Мемлекет басшысы халыққа Жолдауында өңдеу өнеркәсібін дамытуға тың серпін бере отырып, экономиканы әртараптандыруды жеделдету міндетін қойды. Бұл орайда, терең өңдеу өндірістерін дамытуға, сондай-ақ ішкі және сыртқы нарықтарда сұранысқа ие өнімдерді шығаруға басымдық берілуге тиіс, - деді Олжас Бектенов.

Осы орайда ол салалық министрліктер мен ұлттық компаниялардың басшыларына ұзақ мерзімді шарттар мен офтейк-келісімдер арқылы отандық тауар өндірушілердің жүктемесін арттыру және оларды тапсырыстармен қамтамасыз ету мәселелерін тікелей бақылауға алуды тапсырды.

- Отандық шикізатты өңдеу барысында бірінші кезекте жергілікті қайта өңдеу кәсіпорындарына басымдық берілуі қажет. Жауапты мемлекеттік органдарға өңдеу секторына инвестиция тарту жұмысын күшейту үшін қолайлы жағдай жасауды тапсырамын, - деді Үкімет басшысы.

Айта кетейік, Олжас Бектенов әкімдерге барлық саладағы жағдайды тікелей бақылауға алуды тапсырды.