Алматы қаласы туризмдегі инноватор ретінде марапат алды

Алматы қаласы туризмдегі инновациялары үшін халықаралық деңгейдегі марапатқа ие болды.

Ақжолтай жаңалық Бельгияда өтіп жатқан Әлемдік туризм форумында жарияланды. Бұл жиын салаға қатысты жаһандық үрдістер мен жаңа мүмкіндіктерді талқылайтын  ең беделді халықаралық алаңның бірі. 

Форум қонақтары алғашқы сәттен қазақ халқының қонақжайлығын сезінді: бауырсақ пен қазақ шоколадының дәмін татып, ұлттық павильонға қойылған жәдігерлерді қызыға тамашалады. Көрме көшпелі мәдениеттің нышаны киіз үй үлгісінде безендірілді.

Мелвин Бехер, Travelnet компаниясының тең құрылтайшысы, жаһандық туризм бойынша кеңесші:

- Мен Қазақстан туралы көбірек білу үшін Ұлы дала еліне саяхаттағым келеді. Өйткені ғажайып табиғатыңыз бен бай мәдениетіңіз еуропалықтар үшін мүлде басқа әлем.

Лаксон Замбуко, Африка жастары туризм және қонақжайлық қауымдастығының негізін қалаушы:

- Қонақжайлықтарыңыз бен ұлттық тағамдарыңыз өте жоғары деңгейде. Қазақстан туризмнің қарқын алған бағыттарының бірі. Ынтымақтастық орнатуға құлықтымыз.

Ұлттық экспозицияны Бельгиядағы елшілігіміз ұйымдастырып, Қазақстанның Еуразия жүрегіндегі серпінді дамып келе жатқан туристік бағыт екенін көрсете білді. Форум қатысушыларының ерекше назары Алматы қаласының туристік әлеуетіне ауды.

Асқар Төлеутай, Алматы туризм бюросының департамент жетекшісі:

- 2024 жылы бізге 2,3 миллионнан астам адам келді. Ол 23-жылға қарағанда 14 пайызға үлкейген. Осы жылы осы уақытқа дейін санасақ тағы да 10 пайызға көбейіп жатыр.

Ұйымдастырушылардың айтуынша, Қазақстан форум үшін тың серпін әкелді. Алматы аймақтағы ең тартымды туристік бағыттардың біріне айналып келеді, дейді олар.

Булут Баджы, Әлемдік туризм форумы институтының президенті:

- Мен Шымбұлақта, Есентайда болдым. Инфрақұрылымы тамаша, бәрі жап-жасыл, тап-таза, ал тағамдары тіл үйіреді. 

Форумға 50-ден астам елдің өкілі қатысты. Олардың қатарында министрлер, қала басшылары, туроператорлар, сарапшылар және халықаралық ұйымдардың өкілдері бар.

Кубанычбек Омуралиев, Түркі мемлекеттері ұйымының бас хатшысы:

- Түркі елдерінің ауызбіршілігі бекемдей түсті. Енді Ұлы жібек жолы бойындағы ортақ мұрамызды бүкіл әлем тануы үшін бағыттар мен  Инфрақұрылымды дамытуымыз маңызды. 

Қазақстан форумға алғаш рет қатысып, бірден жеңіс тұғырынан көрінді — Алматы қаласы «Туризмдегі инновациялары және урбанистикадағы трансформациясы үшін» жүлдесімен марапатталды. 

Осылайша отандық делегация Әлемдік туризм форумына қатысу арқылы елдің халықаралық беделін нығайтып, Қазақстанды заманауи, қауіпсіз және қонақжай туристік бағыт ретінде таныта алды. 

Ғалымжан Қараманұлы, Жомарт Ахметов