Түркістан облысындағы экотуризмді дамыту үшін сегіз жоба бекітілді

Әлемде туризм саласы, әсіресе экологиялық саяхат қарқынды дамып жатыр.

Біздің елде экотуризмнің әлеуеті зор. Мәселен, биыл Түркістан облысында экотуризмді дамыту үшін құны 7 млрд теңге болатын 8 жоба бекітілді. Өңірде көрікті жерлер өте көп. 

Бірақ соған қарамастан табиғаты тамаша жерлерге туристерді тарту, ондағы қызмет сапасын жақсарту жағы кемшін түсіп тұр. Саяхаттаушыларға көрсетілетін қызмет бағасын қадағалап жатқан ешкім жоқ. Қауіпсіздік те көңіл көншітпейді.

Төле би ауданындағы «Таусамалы» демалыс аймағына еліміздің түкпір-түкпірінен келушілер көп. Барлығы да тұмса табиғатты тамашалап, таудың таза ауасымен тыныстағысы келеді. Мұнда ең бастысы аспалы жол бар. Сол арқылы таудың басына көтеріліп, серуендеп қайтуға болады. Десе де, саяхаттаушылардың көрсетілетін қызметтің сапасы мен бағасына көңілі толмайды. 

Индира Жүсіпова, Қызылорда қаласының тұрғыны:

- Мен Қызылорда қаласынан келіп тұрмын. Бізде тау болмағаннан кейін бұл жер өте қатты ұнайды. Тамақ жағы дұрыс қарастырылмаған екен. Жаңадан сервистер қосса, ойындар алаңын қосса деп ойлаймын. Сонда туристер көбейер еді. 

Жұмагүл Әбдіқадырова, Түркістан қаласының тұрғыны:

- Дамыту керек нәрселер көп. Балаларға жағдай жасалса, сырғанайтын жерлер. Біз сырғанаймыз, балаларға қауіпті жағдайлар бар. Сол үшін оны да қарастырса дейміз. Табиғат бізге керек, көріністі біз түсінеміз. Ал балаларға жақсы ойнайтын жерлер болса дейміз. 

Ал Төңкеріс ауылындағы сырғанақ алаңы қазір облыс тұрғындары мен қонақтарының ең көп баратын жеріне айналған. Демалыс күндері мұнда екі мыңнан аса адам жиналып, сырғанақ теуіп, атпен серуендейді. Ауыл тұрғындары тамақ пісіріп сатып, шана мен балондарды жалға беріп табыс табады. Бірақ сырғанақ алаңын реттеп, тазалық пен қауіпсіздікті қадағалап жатқан жан жоқ. Біздің көз алдымызда сырғанаймын деп, жарақат алған әйелді жедел жәрдем алып кетті.

Құралбек Қыдырбек, Шымкент қаласының тұрғыны:

- Әжетханасы жоқ. Жеке адамдар қойған оны әжетхана деп айтуға болмайды. 100 теңгеден дейді. Орта есеппен күніне мың адам кірсе, 100 мың теңге жеке қалтаға кетіп жатыр. Екіншіден, тамақ істеген оның санитарлық талапқа сай емес екені көзге көрініп тұр. Тазалық, тәртіп бұл жерде жоқ. Адамдар сырғанап жатқан жерде квадроциклмен, атпен жүр. Ол деген балалардың қауіпсіздігі қаралмаған. Яғни бұл жерде адам шығыны болуы да мүмкін. Осыны ауыл мен аудан әкімі реттеу керек. 

Асылбай Балтабаев, Қаратау ауылдық округінің әкімі:

- Бұл жердің егесі ЖШС иелігінде, біз оған барып қазір мына жерге әжетхана сал деп иелік те жасай алмай жатырмыз. Кәсіпкерлерге аттың орны мына жақта бөлек, квадроциклдің орны бөлек, осы жерде жүріңдер деп орнын белгілеп қойып беріп жатырмыз. 

Сала мамандары экотуризмді дамытуға инвесторлар керектігін айтады. Туристік нысандарға апарар жол жөнделіп жатқанымен, оны дамытуға қыруар қаржы керек. Сондай-ақ ерекше қорғалатын табиғи аумақтарға инфрақұрылым салуға шектеу көп. Бұл ірі туристік жобаларды жүзеге асыруға кедергі. Ал әзірге бар нысандарда қызмет сапасын жақсарту, бағаларды реттеу мәселесі кәсіпкерлермен бірлесіп шешілмек.

Ботагөз Мәуленова, Түркістан облыстық туризм басқармасының бөлім басшысы:

- Басқарма тарапынан, әкімдік тарапынан тиісті органдардың өкілдерін қоса отырып, жұмысшы топ құрып, кәсіпкерлерге адам қауіпсіздігі жөнінде түсіндірме жұмыстарын жүргізіп, одан кейін жарнамалық роликтерді шығарамыз деген жұмыс бар. 

Айта кетейік, өткен жылы өңірдің табиғатын тамашалауға 174 мыңнан астам адам саяхаттап келген. Бүгінде шетелдік туристерді тарту үшін тиісті жұмыстар жүргізілуде. Яғни биыл облыста жалпы құны 7 млрд теңге болатын 8 жобаны жүзеге асыру көзделіп отыр. 

Жандос Жұмабек, Ерболат Әбіш