Түркістандағы “Келешек мектебі” оқушылары ұлттық нақышта киінеді

Ұлттық киім – халықтың мәдениеті мен рухани болмысының айнасы. Халқымыздың бай дәстүрінің бір бөлшегі. Мемлекет басшысы Қасым-Жомарт Тоқаев ұлттық киімді тек мерекелік жағдайда ғана емес, күнделікті өмірде де киюдің жарасымды екенін атап өткен болатын. Бұл бағытта Түркістан облысындағы бірқатар білім беру ұйымдары қазақы нақыштағы мектеп формасына көше бастады, - деп хабарлайды Aikyn.kz.

Солардың бірі – Түркістан қаласында «Келешек мектептері» бағдарламасы аясында салынған №32 жалпы білім беретін мектеп. Қазіргі таңда бұл білім ордасында 2100 оқушыға 172 педагог сабақ береді. Өңірдегі алғашқы келешек мектебінің директоры Айгүл Бабашева ұжымы ұлттық құндылықтарды дәріптеу бастамасын ерекше ықыласпен қолдап, оқу орнының мектеп формасын қазақы нақышта әзірлеуді қолға алған.

– Заманауи стандарттарға сай білім ұясына қазақы нақыштағы мектеп формасын енгізу бірден ойымызға келді. Бұл бастаманы ата-аналар да бірауыздан қолдады. Форманың үлгісі ҚР БҒМ №26 бұйрығына сәйкес келеді. Ең бастысы – бұл қадам балаларымыздың бойында ұлттық құндылықтарды сіңіріп, қазақы болмысты жандандыруға септігін тигізеді, – дейді мектеп директоры Айгүл Абайқызы.

Бастауыш сынып оқушылары ою-өрнекпен 2 әдіптелген жекет пен тақия киіп жүрсе, жоғары сынып оқушылары қазақы оюмен безендірілген жекетті классикалық киіммен үйлестіріп киеді. Ұстаздар қауымы да бұл бастамадан шет қалмай, “Біртұтас тәрбие” бағдарламасы аясында әр аптаның жұма күндері ұлттық киіммен сабақ өткізуді дәстүрге айналдырған.

Жобаның негізгі мақсаты – мектеп оқушылары арасында ұлттық киімге деген құрметті қалыптастыру, киім мәдениеті арқылы ұлттың тарихы мен дәстүрін ұлықтау, оқушылардың эстетикалық талғамын арттыру. Сонымен қатар бұл бастама жас буынды өз мәдениетіне мақтанышпен қарауға, қазіргі киім түрлерінен ерекшелігі мен айырмашылығы туралы салыстыра білуге үйретеді.

Ұлттық киім – халқымыздың өткенінен сыр шертетін, ұлт руханиятының жарқын көрінісі. Түркістандағы №32 мектеп ұжымы қолға алған бұл игі қадам – жас ұрпаққа ұлттық тәрбие берудің заманауи үлгісіне айналып келеді.