Түркістандық белсенділер Таза Қазақстан аясында қарияға қолғабыс етті

Түркістандық белсенділер «Таза Қазақстан» акциясы аясында тыл ардагері Раиса Шакироваға қолғабыс жасап, ауласын қоқыстан тазалап берді.

Үш ай бұрын отағасынан айырылған қарт әже қазір жалғыз тұрады. 40 жылдан астам уақыт бойы темір жол саласында еңбек еткен. Жасы 90-ға таяғанына қарамастан Раиса Шакирова әлі тың. Үй шаруасымен өзі айналысады. Қызметтес болған әріптестерінің үйіне барып, дос-жарандарымен жиі араласып тұрады. Кітап оқып, теледидар көргенді жақсы көреді. Зердесі зерек қария жаңалықтың бәрінен хабардар. Белсенді жастар бұл бастама жалғасын табатынын айтады.

Раиса Шакирова, зейнеткер:

- Тыл ардагері, Түркістан қаласының құрметті азаматы болған соң көмек қолын созатындар көп. Бүгін міне бір топ жас келіп, ауламды ретке келтіріп берді. Оларға менің жасымды берсін. Алғыстан басқа айтарым жоқ. Тек жақсылық тілеймін. 

Нариман Мархабаев, "Талантты жастарды қолдау" бөлімінің басшысы:

- Үй жағдайына көмектесіп, қар күреп, қолдау шараларын жасадық. Алдағы уақытта бұл шаралар тек Түркістан қаласында емес, Түркістан облысына қарасты 17 аудан-қала аумағында да өз жалғасын тауып, осындай қолдау шаралары көптеп ұйымдастырылатын болады.