Түркияда ұлттық валюталар күні өтті

Анкарада ұлттық валюта күніне орай қазақ естелік ақшаларының көрмесі өтті.

Экспозицияда ұлттық құндылық пен мәдениетіміз бейнеленіп, тарихи тұлғалар көрініс тапқан 90-ға жуық монета мен қағаз ақша көпшілік назарына ұсынылды. Көрмені «Көкту» қазақ мәдениеті қоғамы ұйымдастырды. Оған Анкарадағы қазақ диаспорасы мен Түркияның лауазымды тұлғалары қатысты. Түркия монета сарайының бөлім басшысы Яшар Чукур сөз сөйлеп, әр экспонаттың тарихи және мәдени маңызына тоқталды. Қазақ пен түрік ақшаларының жасалу үдерісіндегі ұқсастықтар айтылды. Кеш барысында қазақтың күйі күмбірлеп, жиын емен-жарқын әңгімеге ұласты. Түркияда қазақ мәдениетін танытатын естелік ақшалар көрмесі алғаш рет өтті.

Илге Қаракөз Ахметова, “Көкту” қазақ мәдениеті қоғамының төрағасы

- Ұлттық валюта коллекциясына, естелік ақшаларына өте қатты құмаршылық бар түрік халқында. Коллекционерлер келіп жатыр. Бұлардың көбі темір ақша, монета. Сосын Қазақстанның Тәуелсіздігін алған кезде шыққан қағаз ақшалар бар. Әрине бұл коллекция жылдар өткен сайын үлкейіп, көбейе береді.

Яшар Чукур, Түркия монета сарайының бөлім басшысы: 

- Қазақстанда жасалған монеталар біздің мәдениетке де ұқсайды. Сіздерде діни бейнелер, мемлекет қайраткерлері, географиялық аймақтар, ғалымдар бейнеленген. Бізде де солай. Монета технологиясы жағынан да ұқсастықтар бар. Монета басу тәсілдері бірдей. Тек ою-өрнектер әр түрлі. Бірақ процесс те, мақсат та бір. Бүгінгі монеталар 100, 200, 500 жылдан соң ерекше мәнге ие болады.