Түркияда зілзаладан 22 адам зардап шекті

Түркияда жер сілкінді. Балыкесир провинциясында болған дүмпу тұтас аймақты ғана емес, алыс-жақын өңірлерді де әбігерге салды.

Ол аздай, қолайсыз ауа райы апат салдарын жоюға кедергі келтіріп тұр. Қазір Балыкесирде бір күнге мектептер тоқтады. 

Түркияның төтенше жағдайлар басқармасы келтірген мәліметке қарағанда, дүмпу Сындырғы ауданында шамамен 6 шақырым тереңдікте болған. Сілкініс кеше сағат 22:48-де тіркеліп, Ыстамбұл, Измир, Бурса және Маниса қалаларында да сезілген. Ресми дерекке сүйенсек, қаза тапқандар жоқ. Бірақ 20-дан астам адам зардап шеккен. Олардың көбі дүрбелең кезінде үрейден құлап, жарақат алған. Табиғат апатынан әбден зәре-құты қалмаған халық түнді мектептер мен мешіттерде, ашық алаңдарда өткізген.

Али Ерликая, Ішкі істер министрі:

- Жер сілкінісі салдарынан бос тұрған үш ғимарат пен бір дүкен қирады. Үйінділердің астында адамдар жоқ. 112 жедел байланыс орталығына барлығы 504 хабарлама түскен. Оның 25-і ғимараттың зақымдануына қатысты. Бұл хабарламалардың барлығы жеке-жеке қарастырылып жатыр.

Мұнан бөлек аудан орталығы мен көршілес провинцияларда бірнеше нысанға зақым келген. Қазір зілзала аймағында құтқарушылар мен ондаған инженерлік топ жұмыс істеп жатыр. Бірақ толассыз жауған жауын-шашын зардапты бағалауға кедергі келтіруде.

Исмаил Устаоғлу, Балыкесир провинциясының губернаторы:

- Сындырғыда 75 аудан бар. Жандармерия арқылы байланыс орнатылған ауыл әкімдерімен сөйлесу нәтижесінде ауылдарда адам өлімі тіркелмегені анықталды.

Зілзала аймағына Ұлттық медициналық құтқару бригадасы жіберілді. Олар Сындырғыдағы аурухана ауласына жедел әрекет шатырын орнатқан. Құтқарушылар мен жергілікті билік зардаптарды жоюға және қауіпсіздікті қамтамасыз етуге атсалысып жатыр. Айта кетейін, Балыкесир өңірі Түркияның жер сілкінісі қаупі жоғары аймақтарының бірі. Бірнеше айдан кейін тағы да қайталанған бұл апат өңірдің  сейсмикалық қауіп-қатерін еске салып, дайындық пен сақтық шараларының маңыздылығын көрсетті, - дейді сарапшылар.

Авторлары: Ә. Нұрлыбаева, Ж. Сүйіндіков