ТүркПА бақылаушылары референдум күні Астана, Алматы және Түркістан қалаларында жұмыс істейді

Бас хатшының айтуынша, ТүркПА бақылаушылары үш қалада — Астана, Алматы және Түркістанда болады. Ұйым дауыс беру рәсімдерінің ашықтығын қамтамасыз етуге жәрдемдесуге және Қазақстанның бірлестікке төрағалығы кезеңінде жүзеге асырылатын реформаларды қолдауға дайын.

Оның сөзінше, алдағы конституциялық өзгерістер тек Қазақстан үшін ғана емес, бүкіл түркі әлемі үшін маңызды. Себебі олар саяси тұрақтылық пен мемлекеттік институттардың дамуына қатысты мәселелерді қамтиды.

Кездесу барысында тараптар ұйымның халықаралық қызметін де талқылады.

Бас хатшы жуырда ТүркПА делегациясы Венада өткен Еуропадағы қауіпсіздік және ынтымақтастық ұйымының Парламенттік ассамблеясы отырысына қатысқанын, онда бақылаушы мәртебесін алу үшін өтінім беру рәсімі аяқталғанын айтты.

Бұл бастаманы ілгерілетуде Қазақстан тарапынан қолдау көрсетілгені атап өтілді.

Айгүл Құспан өз кезегінде елдегі парламенттік жүйеде жоспарланып отырған институционалдық өзгерістер туралы баяндап, сайлау үдерістеріне сенімді арттыру үшін халықаралық бақылаушылардың қатысуы маңызды екенін жеткізді.

Сондай-ақ, сәуір айында Ыстанбұл қаласында өтетін ТүркПА-ға мүше мемлекеттер парламенттері төрағаларының бейресми кездесуінің маңызы айтылды. Жиын парламентаралық ынтымақтастықты кеңейту мәселелеріне арналмақ.

Бұған дейін Қазақстанның Бакудегі елшісі Әлім Байел Рамиль Гасановқа Қазақстан Республикасының Сыртқы істер министрі Ермек Көшербаевтың алдағы референдумды бақылауға қатысуға шақыру хатын табыстаған болатын.