Ұлттық болмысты сақтаған қазақ қолөнершілері

Өзбекстанның Ташкент облысында қазақтар қоныстанған ауылдардарда қолөнершілер мектебі қалыптасқан.

Мұндағы ағайын ұлтымыздың салт-дәстүрін берік ұстанып, тілін таза сақтап келеді. Ал шеберлердің өнімдері үлкен сұранысқа ие. Он саусағынан өнері тамған Әлия Бөрібаева ұлттық киімдер тігуді үш жыл бұрын бастаған. Содан бері Ташкенттегі қандастарға шапан, қамзол, оюлы құрақ көрпеше тігіп, қуантып келеді. Қазақы дәстүрді ұстанатындар үшін Әлияның қолынан шыққан дүниелердің орны бөлек. Жергілікті өзбек халқының да қызығушылығы зор.

Әлия Бөрібаева, қолөнер шебері:

- Бұл киім осындай мағына береді, бұл біздің дәстүріміз десең, таңғалып: «Сендер қазақтың салтын керемет сақтайсыңдар екен», – деп тамсана қарайды. Қазақтың ою-өрнектері өзіме қатты ұнайды. Қолмен жасап, әдемі шықса, ерекше қуанып қаламын.

Жоғарғы Шыршық ауданында кілең қазақтар қоныстанған ауыл көп. Мұндағы балалар қазақ мектептерінде білім алады. Үлкендер жағы өскелең ұрпақты әрдайым ұлттық құндылықтармен сусындатып келеді.

Жәдігер Қойлыбаева, Жоғарғы Шыршық ауданының тұрғыны:

- Біз қазақтың ұлттық салт-дәстүрін ешқашан ұмытқан емеспіз. Наурыз мерекесі мен түрлі той-томалақтар – бәрі де қазақ тілінде өтеді. Өз тілімізден ешқашан бас тартпадық. Өзбекстанда тұрсақ та, ешкім бізді сендер қазақсыңдар деп бөліп-жарған емес.

Ресми мәлімет бойынша, Өзбекстанда 900 мыңға тарта қандасымыз өмір сүріп жатыр. Тоғыз өңірде қазақ ұлттық мәдени орталығы жұмыс істейді.