Ұлттық қор балаларға бағдарламасына өзгеріс енгізілуі мүмкін

АСТАНА, 23 қаңтар – Sputnik. Ұлттық банк төрағасы Тимур Сүлейменов "Ұлттық қор – балаларға" бағдарламасына өзгеріс енгізу мүмкіндігі қарастырылып жатқанын мәлімдеді, деп хабарлайды Sputnik Қазақстан тілшісі.

Бағдарлама аясында жинақталған ақшаны бір отбасының балалары арасында бір-біріне беруге рұқсат ету мүмкіндігі ұсынылып отыр. Ұлттық банк басшысы бұны "қызық идея" деп атады.

"Оны қарау керек. Егер бір отбасының ішінде болса, мәселен, біреу 22 жасқа келіп, екіншісі 18-де болса, ал үлкені ақшаны пайдаланбаған жағдайда інісіне немесе қарындасына жинауға берсе, қарастыруға болады", — деді Сүлейменов Астанада өткен брифингте.

"Ұлттық қор – балаларға" бағдарламасы аясында берілген ақша оқуға немесе тұрғын үй сатып алуға жұмсалады.

Айта кетері, бүгінде "Келешек" бағдарламасы аясында жиналған ақшаны бауырларға беруге болады. Мәселен, жинақтың иесі грантқа түсіп кетсе, я болмаса, жиналған ақшаның көлемі оқу ақысынан асып тұрған жағдайда қалғанын іні-қарындастарына беруге рұқсат бар.