Ұлым ондай іске бармайды​ : Махамбет ауданындағы күдіктінің отбасының бүгінгі жағдайы​

Жангелдин ауылының екі тұрғынын өлтірді деген күдікпен Махамбет ауданының 29 жастағы тұрғынына іздеу жарияланғаннан кейін, жұртшылықтың назары оның отбасына да ауысты.

Ер адамның туыстары болған оқиғаға дейін ауылда қарапайым өмір сүргендерін және атышулы қылмыстық істің ортасында қаламыз деп күтпегендерін айтады.

Аудан әкімдігі отбасының тұрмысы қарапайым екенін, әлеуметтік қызметтер мен құқық қорғау органдары тарапынан ешқандай шағым болмағанын хабарлады. Негізгі табыс – екі қарт адамның зейнетақысы мен балаларға берілетін жәрдемақы. Көршілерден арыз түспеген, жанжал да тіркелмеген.

Үйде кәмелетке толмаған бес бала тұрады. Қазір оларды күдіктінің анасы – әжесінің қамқорлығында. Оның айтуынша, болған жағдайға қарамастан, немерелерін бағып отыр.

«Маған оларды қарау қиын емес. Өз немерелерім ғой. Айына шамамен 200 мың теңге түседі, сонымен күн көреміз. Жолдасым ауырып, Астанаға кеткен еді, бірақ осы жағдайдан кейін қайтып келе жатыр. Балалар жақсы, бірақ үлкендері ата-анасын жиі сұрайды, кейде жылайды», — дейді Гүлнар Әзмұханова.

Әкімдік дерегіне сәйкес, балалар мектепке барып жүр, тұрмыстық жағдайлары тұрақты. Екеуі мектеп оқушысы, қалғандары – мектепке дейінгі жаста, ішінде бір жасар сәби де бар.

Күдіктінің анасы тергеу барысында жауап берген. Ол ұлының қайда екенін білмейтінін және оның қылмысқа қатысы бар екеніне сенбейтінін айтты.

«Ұлым ондай іске бармайды деп ойлаймын. Біз оны олай тәрбиелеген жоқпыз. Халық шулап жатыр, бірақ мен оның кінәсіз екенін білемін. Полиция келді, барлық сұрақтарына жауап бердім. Бұған дейін ол туралы жаман ештеңе байқамадым, жақсы адам болып өсті», – дейді ол көз жасын тыя алмай.

Әйелдің айтуынша, қараша айының басында ұлы жұбайымен бірге үйден кеткен. Күдіктінің әйелі Ақбаян – қаза тапқандардың қызы. Ол күйеуімен бірге кетіп, тіпті бір жасар баласын да қалдырып кеткен. Енесі келінінің босанғаннан кейін денсаулығы сыр бергенін, ем қабылдағанын айтады. Бірақ оның сөзі ресми деректермен сәйкес келмейді: бұған дейін құзырлы органдар Ақбаян Мұқанғалиева ешқандай есепте тұрмайтынын хабарлаған еді.

«Оның денсаулығы нашарлап кеткен. Олар Түркияға емделуге барды. Бізден ақша сұраған жоқ. Ұлымнан қаражатты қайдан алғанын сұрадым, ол Ақбаянның әкесі малын сатты деді. Шын мәнінде қалай болғанын білмеймін», – дейді ол.

Әйелдің айтуынша, ұлы бұрын үнемі хабарласып тұрған, мінез-құлқында күдікті ештеңе байқалмаған.

Бұрынғы сыныптастары күдіктіні тұйық адам ретінде сипаттайды.

«Біз де аң-таң болып отырмыз. Мектепте ол өте тұйық еді, тоғыз жыл бойы ешкіммен көп араласқан жоқ. Кейін қалаға кетіп қалды, бізде оның телефон нөмірі де болмады. Араласатын адамдары аз болатын. Естігеніміз — күзетші, жүкші болып жұмыс істепті, әскерде де болған», — дейді сыныптасы.

Тергеу жалғасып жатыр. Құзырлы органдар барлық қорытынды мен шешімдер тергеу аяқталғаннан кейін қабылданатынын атап өтті.

Айгүл МАНСУРОВА

Бүгін, 10:55