Махамбет ауданындағы көпір аман, бірақ қиябеті опырылып қалды

Жайық өзені арқылы өтетін ұзындығы 860 метрлік көпірдің зақымданғаны туралы суреттер жүргізушілерді қатты алаңдатты. Ал аудан әкімдігі көпірдің тірек конструкцияларына зақым келмегенін мәлімдеді.

«Ақ Жайыққа» белгілі болғандай, су көпірдің бір жағындағы топырақты шайып кеткен, соның салдарынан бетон плиталар шөгіп, су бұру науасы ішінара бұзылған.

«Осы жерден өткен сайын бойымызды үрей билейді. Көпірдің бір бөлігінің астындағы топырақ шайылып кеткен, ал су бұру құрылыстары қазірдің өзінде қирап тұр», — дейді автокөлік жүргізушілері.

Жайық арқылы өтетін бұл көпір 2018 жылы пайдалануға берілген. Оның құрылысына 9,4 млрд теңге бөлінді. Бас мердігер — «Атырауинжстрой» ЖШС, ал құрылыс жұмыстарын «Энергомост» ЖШС жүргізді. Қазір нысан Махамбет аудандық тұрғын үй-коммуналдық шаруашылығы бөлімінің теңгерімінде тұр.

Аудан әкімі Қайрат Нұрлыбаевтың айтуынша, зақымдануға жауын-шашын салдарынан топырақтың шөгіп кеткені себеп болған. Ол көпірдің тіректері мен аралық құрылымдарына зақым келмегенін айтып сендірді.

2024 жылғы көктемгі су тасқынынан кейін нысан екі рет тексерілді. Әкімдік мәліметінше, темірбетон конструкцияларының беріктігі жобалық талаптарға сай келеді, ал мамандар қозғалыс қауіпсіздігіне әсер ететін кемшіліктерді анықтаған жоқ.

Қазір көпірдің зақымданған жерлері туралы акт жасалып, қалпына келтіру жұмыстары басталып кетті. Көпірді кезекті тексеру 2026 жылдың қазан айына жоспарланған. Одан кейін мамандар күрделі жөндеу қажет пе, жоқ па, соны шешеді.

Ләззат ҚАРАЖАНОВА

Бүгін, 09:30