ҰҚК иттердің тамағына 3 млрд теңге бөлген

ҰҚК Шекара қызметінің қызметтік иттеріне арналған құрғақ жем сатып алуға 3 млрд теңге бөлінген, деп хабарлайды Arasha.kz.

Шынын айту керек, бұған мақтану керек пе, таңдану керек пе, әлде мұндай шығындардан қорқатын уақыт келді ме — білмейміз, деп жазды Protenge телеграм арнасы. 

Сомаға қарағанда, иттерді элиталық жеммен асырау көзделген сияқты. Атқаратын міндеттерін ескерсек, бұл орынды да шығар. Бірақ шекарашылардың қызметінде қанша ит бар және құрғақ жемге 3 млрд теңге жұмсау расымен негізді ме?

Мемлекеттік сатып алулар базасы арқылы ҰҚК-нің сатып алу көлемі мен сипаттамаларын көре алмаймыз. Техникалық тапсырманың орнына ашық қолжетімділікте тек «қызметтік ақпаратты жария етпеу туралы міндеттеме» орналастырылған. Сондықтан тек қызметкерлердің адалдығына сенуге тура келеді, ал оны жария құжаттар арқылы тексеру мүмкін емес.

Жұбататын жайт — бұл сатып алу бәсекелі форматта өткендей көрінеді. Себебі әлеуетті жеткізушілер тізімінде 127 компания бар. Бағаны төмендетуге мүмкіндік болған шығар. Бірақ оның рас-өтірігі ашық базада көрсетілмеген.