Вашингтонда Қазақстандағы діни бостандық деңгейін бағалаған есеп жарық көрді

Қыркүйек айындағы VIII әлемдік және дәстүрлі діндер лидерлерінің съезі кезінде жүргізілген зерттеу жұмысының нәтижесі АҚШ Конгресі ғимаратында таныстырылды. Қазақстан тарапының шақыруымен арнайы келген мамандар Астана, Алматы, Шымкент, Ақтөбе, Ақтау және Атырау қалаларындағы түрлі діни топтармен бетпе-бет кездесіп, тәуелсіз  сұхбат жүргізген. Зерттеу тобы Қасым-Жомарт Тоқаевтың “Тыңдаушы мемлекет” тұжырымдамасының нәтижесінде пайда болған диалог алаңдарының тиімділігін тілге тиек еткен. Сол арқылы түрлі діни топтар қауіп ошағы емес, онымен күрестегі әріптестер ретінде жаңа деңгейге көтерілген. Сондай-ақ “Жусан” операциясы, Діндер съезі, лаңкестікпен күрестегі халықаралық ынтымақтастық пен мемлекеттің көп векторлы сыртқы саясатына да ерекше көңіл бөлінген.

Уэйд Кюсак, Love Your Neighbor Community президенті әрі негізін қалаушы:

- Белгілі бір елдегі діни бостандық деңгейін бағалағанда сол қауымды құдды бір вакуум ішінде өмір сүріп жатқандай қабылдап, ішкі-сыртқы әсерлерді ұмыт қалдырып жатады. Өзге елдердің негізінде жасалған “халықаралық стандарттармен” салыстырып шешім шығару - қынжылтатын әрекет. Діни бостандықтың дамуына сол қоғамның тарихи және геосаяси жағдайы, қауіпсіздік мәселелері, заң шығару мен оның сақталу деңгейі тікелей әсер етеді. Біз осы факторларды ескеріп, Қазақстандағы діни бостандықты бағалап, өз ұсыныстарымызды есепке енгіздік.

Крис Сайпл, Love Your Neighbor Community аға зерттеушісі:

- Бұл есеп ешбір үкіметтік ұйымның араласуынсыз жасалды. Жалпы Қазақстан тарапының зерттеу жүргізу үшін ашық шақыруы, тәуелсіз сарапшыларымыздың болуы, ресми органдардан ашық жауап алу мүмкіндігі, түрлі діни топтардың өкілдерімен бетпе-бет кездесе алу ықтималдығы АҚШ Конгресіне, Мемлекеттік департаментіне, Дін істері бойынша комиссияға  ашық белгі береді деп есептеймін. Бұл Қазақстанның сындарлы диалогқа, оң өзгеріске бейім екенін көрсетеді.