Венесуэланы АҚШ басқарады Дональд Трамп

АҚШ Венесуэланы басқарады.

Дональд Трамп Каракасқа жасалған әскери операциядан кейін осылай деп, баспасөз брифингінде мәлімдеді. Сондай-ақ АҚШ билігі Николас Мадуроны тұтқындау кезіндегі оқиғаның мән-жайына тоқталып, Венесуэлаға қатысты жоспарын мәлім етті. Айтуынша, елде тұрақты үкімет қалыптасқанша, уақытша өтпелі билік Вашингтонның қолында болады. Қажет болған жағдайда әскер енгізуге де дайын екенін айтты. Сондай-ақ операция барысында АҚШ қарулы күштеріне қарсылық көрсету кезінде Куба азаматтарының опат болғанын да тілге тиек етті. 

Дональд Трамп, АҚШ президенті: 

«Қауіпсіз әрі байыпты билік ауысуы болғанға дейін елді өзіміз басқарамыз. Бұрынғы жағдайдың қайталануына жол бергіміз келмейді. Сондай-ақ Венесуэладағы мұнай саласы ұзақ уақыт бойы тоқырауда болды. Біз американдық ірі мұнай компанияларын тартып, тозған инфрақұрылымды миллиардтаған инвестиция арқылы қалпына келтіруге және елге табыс әкелуге дайынбыз. Қажет болса, екінші, анағұрлым ауқымды соққы жасауға да әзірміз. Алайда алғашқы әрекет өте сәтті өткендіктен қосымша соққы қажет болмауы мүмкін. Соған қарамастан кез келген сценарийге дайынбыз».

Дэн Кейн, Біріккен штаб бастықтары комитетінің төрағасы:

«Операция Каракаста түнгі 02:01-де басталды. Ұстау тобы нысанға жылдам әрі дәл кіріп, аумақты толық бақылауға алды. Тікұшақтарға оқ атылды, сондықтан біздің тарап өз-өзін қорғау мақсатында оқпен жауап берді. Бір әуе кемесі зақымданғанымен миссияны жалғастырып, аман-есен оралды. Мадуро мен оның жұбайы қарсылықсыз беріліп, АҚШ Әділет министрлігі тарапынан қамауға алынды. Операция жоғары кәсібилікпен өтті, америкалық тараптан адам шығыны болған жоқ. Қарулы күштер әуе қолдауымен Венесуэла аумағынан қауіпсіз шығарылды».

Қазір Николас Мадуро жұбайымен бірге Нью-Йорктегі қамау орындарына тоғытылды. Келесі апта Манхэттен федералды соты заңсыз қару-жарақ пен ескірткі істері бойынша айыпқа тартады.