Заң бұзылмады, адамдар белсенді болды ТМД Атқарушы комитетінің бақылаушылары

АСТАНА, 15 наурыз – Sputnik. ТМД Атқарушы комитетінің бақылаушылары жаңа Конституция бойынша референдумда дауыс беру кезінде заң бұзушылықты анықтамады. Бұл туралы Sputnik Қазақстанға миссия басшысы Игорь Петришенко айтты.

"Біз таңнан бастап белсенділікті байқадық. Кейін учаскелерге барғанымызда адамдар отбасыларымен бірге дауыс беруге келіп жатқанын көрдік", – дейді ол.

Петришенконың айтуынша, Орталық референдум комиссиясы мен учаскелік аймақтық комиссиялардың дайындығы мен түсіндіру жұмысы жақсы жүргізілген, комиссия өкілдері тәжірибелі әрі барлық мәселені сол жерде шешкен.

Сондай-ақ үйде дауыс беру оперативті түрде ұйымдастырылған және барлық процедура сақталған.

"Мысалы, екі өтініш түсті, біздің комиссияның екі мүшесі учаскеде дауыс беруге мүмкіндігі болмаған адамдардың үйіне бақылаушылармен бірге барды", – деді Петришенко.

Сонымен қатар, миссия басшысы көптеген учаскеде қоғамдық бақылауды жастар жүргізгенін, сонымен бірге жастардың дауыс берудегі белсенділігін атап өтті.

"Тікелей 10 учаскені өзіміз барып көрдік, басқа әріптестеріміз де аймақтарда жастардың белсенді болғанын айтып жатыр", – деді Петришенко.

Ол миссия жұмысының алдын ала қорытындысын ертең, 16 наурызда жариялайтынын айтты.