Жалған мейірімділік пен популизм: Тоқаев Қазақстандағы әлеуметтік төлемдер туралы

Президент Қасым-Жомарт Тоқаев Қазақстандағы негізсіз әлеуметтік жеңілдіктер мен төлемдер беру тәжірибесін сынға алды. Бұл туралы Мемлекет басшысы Қазақстан халқына Жолдауында мәлімдеді, деп хабарлайды Tengrinews.kz тілшісі.

Президенттің айтуынша, өткен онжылдықтарда мемлекеттік басқарудағы кемшіліктерді халыққа әлеуметтік көмекті көбейту арқылы жасыруға тырысқан. Бұл ретте елде мектептер мен ауруханалар тапшылығы артып жатқанда, төлемдерді тіпті ауқатты отбасылар да алып келген.

"Өткен онжылдықтарда мемлекеттік басқарудағы қателіктер мен кемшіліктерді әлеуметтік көмекті қарқынды түрде арттыру, яғни азаматтардың көңілін табу арқылы бүркемелеу үйреншікті жағдайға айналды", - деді Тоқаев.

Мемлекет басшысы мұндай тәжірибе қоғамда масылдық пиғылдың артуына ықпал еткенін, сондай-ақ әлеуметтік қамсыздандыру жүйесіндегі теріс пайдаланушылықтар мен сыбайлас жемқорлық схемаларына жағдай жасағанын атап өтті.

"Бюджет қаражаты есебінен адамдарға жалған жанашырлық таныту – бұл халықтың мүддесіне және елдің тұрақты дамуына қарсы бағытталған түрлі айла-шарғыларды солақайлықпен бүркемелейтін нағыз популизм", - деп қадап айтты Президент.

Тоқаевтың пікірінше, негізсіз жеңілдіктер мен төлемдердің шамадан тыс көптігі мемлекеттік аппараттың әлсіздігін және ұзақ мерзімді жоспарлаудың жоқтығын көрсетеді.

Осыған байланысты Мемлекет басшысы әлеуметтік саясатқа деген көзқарастарды қайта қарауға шақырды.

"Сондықтан әлеуметтік саясатты түбегейлі қайта қарап, оны бір күндік мәселелерді шешуден стратегиялық мақсаттарға жетуге бағыттау маңызды. Қайталап айтамын: мемлекеттік көмек шын мұқтаж адамдарға ғана берілуге тиіс. Үкіметтің алдында тұрған басты міндеттің бірі – осы. Жалпы, бұл салада өзекті мәселелер аз емес, соған байланысты Үкімет өз ұсынысын, шешімдерін беруде", - деді Президент

Мемлекет басшысының айтуынша, қазір қоғамда осы мәселелер бойынша қызу талқы жүріп жатыр. Азаматтар өздерін алаңдатқан мәселелерді ашық айтып жатыр.

"Сондықтан бұл күрделі мәселені "өгізді өлтірмей, арбаны сындырмай", байыппен, салмақты көзқараспен шешу қажет. Артық қыламын деп, тыртық қылуға мүлдем болмайды. Кез келген реформа терең сарапталып, мұқият зерттеліп, азаматтардың жағдайын мейлінше ескере отырып жүргізілуге тиіс. Әлеуметтік көмектің жаңа тәсілдерін, соған қатысты ақпараттық жүйелердің қызметін алдын ала мұқият тексерістен өткізу қажет. Ең дұрысы, ондай жобаларды әуелі пилоттық режимде іске қосып, тиімділігі расталған соң ғана кең ауқымда қолдану керек", - деді Мемлекет басшысы.

Президенттің айтуынша, әлеуметтік мемлекет дегеніміз – азаматтарды әлеуметтік төлемдерге тәуелді ету емес, бұл, ең алдымен, халықтың тұрмыс сапасын, әл-ауқатын арттыру деген сөз.

"Сондықтан біз адам капиталының сапасын жақсартуға және өскелең ұрпақтың жан-жақты дамуына қолайлы жағдай жасауға баса мән беріп отырмыз", - деді Президент.

Сондай-ақ Президент "Халықтық құрылыс" ауқымды бағдарламасы жиналып қалған құрылымдық теңсіздіктерді жоюға бағытталғанын түсіндірді. Оның айтуынша, халық санының өсуі мен ішкі көші-қон әлеуметтік нысандарға шамадан тыс салмақ салып отыр, олардың көбі қазірдің өзінде мүмкіндігінің шегінде жұмыс істеп тұр.

Еске сала кетейік, 28 қазанда Президент Қасым-Жомарт Тоқаев Қазақстан халқына жыл сайынғы Жолдауын жариялап жатыр.

Мемлекет басшысы алғаш рет бірпалаталы парламент – Құрылтай отырысында Жолдау жариялап отыр.

Бізді Google-дың негізгі дереккөздер тізіміне қосыңыз