​Жалған суррогат келісім: жас ана мен делдалдар сотталды

Астанада жаңа туған баланы заңсыз берген іс бойынша сот үкімі шықты.

Қалалық прокуратура анықтағандай, елорданың 19 жастағы тұрғыны жүктіліктің сегізінші айында жалған суррогат ана келісімін жасап, сәбиін делдалдар арқылы ерлі‑зайыпты жұпқа ақшалай сыйақы үшін тапсырған.

Сот 2025 жылғы 23 мамырда қызды және делдалдарды ҚР Қылмыстық кодексінің 135-бабы («Кәмелетке толмағандар саудасы») бойынша кінәлі деп таныды. Оларға пробациялық бақылаумен шартты түрде 8 жыл бас бостандығынан айыру жазасы тағайындалды.

Баланың құқықтарын қорғау мақсатында ол кәмелетке толмағандарға арналған мамандандырылған мекемеге орналастырылды. Сонымен қатар, Астана қаласы әкімдігінің талап-арызы негізінде анасы ата‑ана құқықтарынан айырылды.

Прокуратура балаларға қатысты заңсыз мәмілелер қылмыстық жауаптылыққа әкеп соғатынын және мұндай істер құқық қорғау органдарының ерекше бақылауында екенін еске салды.

Бүгін, 14:40