Ақмолада суррогат ана сәтсіз жүктілік үшін ақшаны қайтаратын болды

Ақмола облыстық сотының баспасөз қызметінің хабарлауынша, ерлі-зайыптылардың сәтсіз болған суррогат анадан материалдық шығынды өндіру және моральдық зиянды өтеу туралы талап арызы облыстық соттың сот алқасында қаралды.

— 2024 жылы ерлі-зайыптылар Е. мен азаматша Д. суррогат ана болу туралы шарт жасасқан. Шартта ұрықтандырудың 2 әрекеті көзделген. Бірінші әрекет кезінде эмбрион бекімеген. 2024 жылғы желтоқсаннан 2025 жылғы ақпанға дейін ерлі-зайыптылар Д.-ға 500 мың теңгеден астам қаражат аударған. 2025 жылғы наурыз айына жоспарланған екінші әрекет Д.-ның келмеуіне байланысты жүзеге аспаған. 2025 жылдың сәуір айында ерлі-зайыптылар әрі қарайғы рәсімдерді тоқтату туралы өтініш жазған, — деп сот істің мән-жайы баяндады.

Ерлі-зайыптылар жұмсалған қаражатты өндіру және моральдық зиянды өтеу туралы талап коюмен сотқа жүгінген. Себебі, олардың пікірінше, ол шарт бойынша міндеттемелерін бұзған. Бірінші сатыдағы сот шешімімен талап ішінара қанағаттандырылды. Ерлі-зайыптылардың пайдасына 550 мың теңге қарыз сомасы, тексеру, дәрі-дәрмек, жол шығындары және 500 мың теңге моральдық зиян өндірілді.

Алқа бірінші сатыдағы соттың материалдық шығындарды өндіру туралы шешімі негізді деп таныды.

— Төленген барлық сома Д.-ға екінші әрекетке де қатысты аударылған. 550 мың теңге жүктілік кезеңінде толыққанды тамақтану үшін қарызға берілген, алайда жүктілік болмаған. Екінші рәсім Д.-ның кінәсінен өтпеген, қаражат оның дайындалуына жұмсалған. Д. екінші әрекеттен бас тартуын негіздеу үшін кардиолог пен терапевтің тексеру нәтижелерін ұсынған, онда қосымша тексеруден кейін рәсімді өткізуге болатыны көрсетілген. Алайда бұл қорытындылар барлық қаражат алынғаннан кейін берілген және шартта көзделмеген медициналық ұйымдардан алынған, — делінген сот хабарламасында.

Алайда сот алқасы моральдық зиянды өтеу өндіруге жатпайтынын анықтады, себебі келісімшартта биоматериалдарды сақтау шарттары мен басқа да қажетті тармақтар көрсетілмеген. Осылайша, суррогат ана талапкерлердің тек мүліктік құқықтарын бұзған деп танылды. Сондықтан облыстық сот алқасының қаулысымен бірінші сатыдағы сот шешіміне өзгеріс енгізіліп, моральдық зиянды өтеу туралы талаптың күші жойылды.

Айта кетейік, елімізде заңсыз суррогат ана қызметі көрсетілетіні жиі әшкере болып жатады. Соның кесірінен әйелдердің құқығы бұзылады әрі олар денсаулығын қатерге тігеді. Ал делдалдар кірістің басым бөлігін алып, пайдаға кенеледі. Jibek Joly телеарнасында аталған заңсыздықтың іске асу схемалары, қыз-келіншектердің оған бару себептері мен әйелдерге төнетін қауіп жөнінде арнайы репортаж дайындалған еді.