Жаңа идеялар ұсына алатын, жас әрі тың саясаткердің пайда болуы шабыттандырады

Reuters хабарламасына сүйенген Aikyn.kz жаңа әкімнің тұрғындарға қандай уәде беріп жеңгенін түсіндіреді.

Зохран Мамдани жалдау ақысын өсірмеу, тегін автобустар жүргізу, барлық балаға балабақшаны қолжетімді етуге уәде берді. Фото crainsnewyork.com сайтынан алынды

4 қарашада ақшыл бұйра шашты Моррис Кац есімді жігіт үлкен жеңісті тойлады. Оның командасы кандидат ұсынған таңдаулы идеяларды сайлаушыға анық әрі әсерлі жеткізіп, саяси науқанның жүлдесін алды. Зохран Мамданидің сайлау науқанының бас медиа-стратегі Моррис Кац кандидат ұсынған таңдаулы идеяларды сайлаушыға сенімді жеткізіп, жеңісті жақындатты. Жалдау ақысын өсірмеу, тегін автобустар жүргізу, барлық балаға балабақшаны қолжетімді ету. Бұл уәделер жас сайлаушылардың ойынан шықты.

Кац үміткер Мамданимен өткен жылы, праймериз басталмай тұрып жұмыс істей бастаған. Сол кезде Мамдани штаттың әлі танымал емес ассамблеясының мүшесі еді. Стратегтің айтуынша, Мамданидің мақсаты – өз сенімдеріне негізделген батыл саяси бағдар ұсыну болған.

«Бізге көп дауыс керек болды. Бірақ саясатты тек бұрынғы шеңберде қабылдауға болмайды. Біз саясатты қандай бола алады деп елестете алсақ, соны шындыққа айналдыра аламыз», – дейді Кац.

Мамдани бұл жолы тәуелсіз кандидат ретінде сынға түскен бұрынғы губернатор Эндрю Куомо мен республикашыл Кёртис Сливаны сенімді түрде жеңді.

Мамданидің прогрессивті үндеуі Нью-Йорк сайлаушыларын ерекше жігерлендірді. Бұрын сайлауға қатыспаған мегаполис тұрғындары учаскелеріне келді. 8,5 млн адам тұратын Нью-Йорктегі сайлауға қатысушылар саны 2 миллионнан асып, 1969 жылдан бергі ең жоғары көрсеткіш тіркелді. NBC News жүргізген экзит-пол деректері жас сайлаушылар, қалаға жаңадан келгендер және жалға алушы азаматтар шешуші рөл атқарғанын көрсетті.

26 жастағы актер әрі бармен Майкл Дарби: «Жаңа идеялар ұсына алатын, жас әрі тың саясаткердің пайда болуы – шабыттандырады», – дейді.

Угандада туған, қала тарихындағы алғашқы мұсылман және алғашқы оңтүстік азиялық мэр – Мамдани көпұлтты қаланың әр алуан тұрғындарын өз жағына тарта алды. Ол қала аудандарының төртеуінде жеңіске жетіп, праймеризден басталған серпінін бекіте түсті.

Бангладештен келген шағын кәсіп иесі, 62 жастағы Хумаюн Ахмед: «Бай мен кедейдің арасын жақындастыру керек», – деп дауысын Мамданиге бергенін айтқан.

Мамданидің ірі әлеуметтік бастамалары салықтарды көтеруді талап етеді. Бұл ұсыныстарды Нью-Йорк штатының орталықшыл губернаторы Кэти Хочул және заң шығарушы орган оңай қабылдамауы ықтимал. Ал федералдық деңгейде Дональд Трамп әкімшілігі қысым жасауы мүмкін. Саясаттанушы Бэзил Смайкл атап өткендей:

«Нью-Йорк – басқаруы ең қиын қалалардың бірі. Мамдани бірінші жылы қала тұрғындарын ортақ мақсатқа жұмылдыруға көп күш салуға мәжбүр болады».

Мамданидің жеңісі – Нью-Йорк жұртшылығының өзгеріс пен әлеуметтік әділдікке деген сұранысын айқын көрсетті. Ендігі үлкен сын – осы уәделерді шынайы саясатқа айналдыру, орындау. Оның табысы жас буынның үмітін ақтай ала ма, жоқ па – алдағы жылдар көрсетеді.Мамдани туралы қысқаша мәлімет

Зохран Мамдани – мұсылман, соңғы 100 жылда бұл лауазымға сайланған ең жас саясаткер. Ол 1991 жылы 18 қазанда Кампалада (Уганда) үнді текті отбасында дүниеге келген. Әкесі – саясаттанушы және антрополог Махмуд Мамдани, анасы – кинорежиссер Мира Наир. Мамдани балалық шағын Африка мен Америка Құрама Штаттарында өткізді. Оның отбасы Нью-Йоркке Зохранның бала кезінде көшіп келді. 2018 жылы Зохран Мамдани АҚШ азаматтығын алды. Мамдани Нью-Йорк қаласындағы Бронкс жоғары ғылыми мектебінде оқып, Боудойн колледжінде африкатану мамандығы бойынша бакалавр дәрежесін алады. 2025 жылы ол сириялық суретші және аниматор Рама Дуваджиге үйленген.

34 жастағы Зохран Кваме Мамдани Нью-Йорк қаласының 111-ші мэрі болып сайланды. Ол сайлаушылардың 50,4% дауысын жинаған. Жаңа мэр 2026 жылдың 1 қаңтарында ант береді. 

Мамдани – мегаполис тарихында алғашқы мұсылман мэр және бұл лауазымды иеленген Оңтүстік Азиядан шыққан алғашқы адам.

Зохранның сайлау платформасында қалада тегін автобустар енгізу, жалға берілетін тұрғын үйлердің жалдау ақысын өсірмеу, мектепке дейінгі мекемелер мен муниципалды азық-түлік дүкендерінің желісін құру бар.

Бұқаралық ақпарат құралдары Мамданидің бұндай жауапты қызметте тәжірибесі жоқ екенін айтады. Саясаткер өзін демократиялық социалист ретінде көрсетеді. Мамданидің кандидатурасын қолдаған демократ-сенатор Берни Сандерс өз қолдауын былай түсіндіреді:

«Біздің ұлт іргелі таңдау алдында тұр. Біз миллиардерлер басқаратын корпорациялар билейтін саясатты жалғастырамыз ба, әлде олигархия, авторитаризм және клептократиямен күресуге дайын қарапайым халықтың қолдауына негізделген жаппай қозғалыс құрамыз ба?» 

Дональд Трамп өз кезегінде кандидатты «радикалды солшыл», «100% коммунистік есі ауысқан» деп атаған. Жастық жігері Зохран Мамданиге көмектесіп, тұрғындардың сенімі ақтала ма, әлде бұрылуы қиын үлкен кеме инерциямен өзгеріп үлгермей ме? Алдағы 4 жыл Нью-Йорк үшін басқаларға ұқсамайтын жас саясаткер басқаратын қызық уақыт болмақшы. 

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.