Жаңа Конституцияның әр бабын заңнамада тәпсірлеп, іске асыру қажет Байменов

- Кез келген заң, оның ішінде Конституция өскелең адамға пішілген киім сияқты болуы керек. Бір жағынан ол оның осы жеткен деңгейін, көлемін есептесе, екінші жағынан оның ары қарай дамуына жағдай жасауы тиіс. Сонымен қатар саяси реформалар өз бетімен өмір сүрмейді. Саяси реформалар экономиканың, халықтың әл-ауқатының даму негізі болып қаланады, - деді комитет басшысы.

Осы тұрғыда ол 1995 жылы қабылданып, осы уақытқа дейін қолданыста болған Конституцияның тіліне көңіліміз толмағанына назар аудартты.

- Мәселен, «құқық» деген сөз бен одан туындылар 122 рет, ал «һақ» пен одан туындылар 19 рет пайдаланылған және кейде бір-бірімен қарама-қайшы болса, кейде бір-бірін толықтырып тұратын. Сол секілді көптеген ерекшелік бар. Сонымен қатар 1995 жылғы Конституция басында басқа тілде жазылып, содан аударылғаны көрініп тұрды. Ал жаңа Ата заңымызда Преамбуладан бастап өзіміздің жаңа деңгейімізді әлемге паш етіп жатырмыз. Бұрынғы Конституцияда ол «ортақ тарих біріктірген, әйтеуір түрлі жолмен келген» деген секілді болса, жаңа Ата заңда «мемлекет аясында өмір сүріп жатқан біртұтас халықпыз» деп айтып отырмыз. Ескісінде «байырғы қазақ жерінде мемлекетті енді құрып жатырмыз» деп айтылса, жаңасында «осы мемлекеттің тұрғынымыз, бұл жерге қаңғып келгеніміз жоқ, ата-бабамыздың мұра қылып қалдырған жері, жермен қоса мәдениетті де, мемлекеттік дәстүрді де қалдырды және осының бәріне мұрагерміз» деп жарияладық, - деді ол.

Комитет төрағасы Конституциядағы негізі құндылықтар кез келген жүйенің басқаруында шешуші рөл атқаратынын айтады.

- Бір атақты адамның «кез келген стратегияны мәдениет таңғы асқа жеп қояды» деген сөзі бар. Себебі,стратегияны жүзеге асыратын күш - халықта. Кез келген Конституцияны, заңды, жазылған стратегияны қалай жүзеге асыру әркімге, әр азаматқа байланысты. Не нәрсені құндылық деп есептейміз? Осы тұрғыдан алғанда Ата заңға білім, еңбек, өнер, инновацияны енгізуіміз ол тек декаларция емес. Ол ары қарай оны заңнамада басшылыққа аламыз деген сөз. Конституцияны қабылдадық, жұмыс бітті деген болмайды. Конституция қабылданғанан кейін оның әрбір бабын заңнамада тарқатып, тәпсірлеп жүзеге асыруымыз қажет, - деді Әлихан Байменов.

Оның пайымынша, Тәуелсіздік алғаннан кейінгі романтика алғашқы жылдардағы қиындықтарды еңсеруге көмектесті.