Жаңа мектептер, емханалар, жолдар: Атырауда бір жылда не өзгерді?

Атырау облысының әкімі Серік Шәпкенов қала тұрғындарымен кездесіп, өңірдің әлеуметтік-экономикалық дамуы мен жүзеге асырылып жатқан инфрақұрылымдық жобалар туралы кеңінен баяндады. 

Әкімнің айтуынша, білім беру саласында «Келешек мектептері» ұлттық жобасы аясында алты мектеп салу жоспарланған, оның төртеуі пайдалануға берілді. Береке және Водник шағынаудандарында 1200 орындық, Сарыөзекте 300 орындық, Жұлдыз-2 шағынауданында 900 орындық жаңа мектептер ашылды. Жұлдыз-3 және Ақсай-2 шағынаудандарындағы мектептер қабылдау кезеңінде тұр. Сонымен қатар бірнеше мектеп пен жапсаржай құрылысы жүріп жатыр. Ал оқу жылының үшінші тоқсанында Ақ шағала шағынауданында 2000 орындық «BINOМ» инновациялық мектебі ашылады деп жоспарланған.

Денсаулық сақтау саласында Алмалы және Береке елді мекендерінде дәрігерлік амбулаториялар салынды. Облыстық аурухана мен фтизиопульмонологиялық орталықта күрделі жөндеу жұмыстары жалғасуда. Өркен және Нұрсая шағынаудандарында екі заманауи емхана салынып жатыр, оларды 2026 жылдың бірінші тоқсанында ашу көзделген. Сонымен бірге бірнеше шағынауданда орталық жедел жәрдем станциясы мен онкодиспансердің радиологиялық корпусы бой көтеруде. Бұл нысандар 2026 жылдың үшінші тоқсанында пайдалануға беріледі.

Тұрғын үй құрылысы да қарқынды жүріп жатыр. Береке шағынауданында үш 72 пәтерлі тұрғын үйге инженерлік инфрақұрылым тартылуда, сондай-ақ 240 пәтерлі үйдің құрылысы жүргізілуде. Самал шағынауданында алты тұрғын үй салынып, оның төртеуі дайын. Мұса Баймұханов көшесіндегі 30 пәтерлі үй пайдалануға беріліп, құжаттары рәсімделуде.

Жер қатынастары саласында игерілмеген жерлер мемлекет меншігіне қайтарылып, жаңа елді мекендердің жоспары жасақталуда. Самал шағынауданындағы жер телімдеріне инженерлік желілер тартылып жатыр, жұмыстар 2026 жылы аяқталады. Кезектегі азаматтарға жер телімдері беріліп, инфрақұрылым жобалары іске асырылуда.

Сумен жабдықтау және кәріз жүйесін жаңғырту жұмыстары да жалғасуда. Қаладағы ондаған шақырым желілер жаңартылып, су тазарту имаратының қайта жаңғырту жұмыстары 75 пайызға орындалды. «Квадрат» булану алаңындағы жұмыстар 2026 жылы аяқталады.

Электрмен жабдықтау және көшені жарықтандыру бағытында да ауқымды жұмыстар атқарылуда. Нұрсая мен Сарыөзек шағынаудандарында электр желілері жаңартылып, қосымша трансформаторлық станциялар орнатылды. Жүздеген көше жарықтандырылды.

Жол инфрақұрылымында бірнеше шағынауданда көшелерге асфальт төселіп, жаңа жолдар салынып жатыр. Орташа жөндеу жұмыстары жүргізіліп, жол қауіпсіздігін арттыру мақсатында ондаған көшенің жолы жаңартылды.

Абаттандыру және көгалдандыру саласында екі мыңнан астам ағаш пен сәндік өсімдіктер отырғызылды. «Халық қатысатын бюджет» жобасы аясында ондаған аула абаттандырылып, спорт және балалар алаңдары пайдалануға берілді.

Әкім барлық жобаның іске асырылуы тұрақты бақылауда екенін атап өтіп, кездесуді тұрғындармен ашық диалог форматында жалғастырды.

Бүгін, 12:25