Жаңа жыл қарсаңында ел тұрғындары не нәрсені көбірек іздеуге кірісті?

Жаңа жыл жақындаған сайын адамдар қарқынды түрде жақындарына сыйлық іздей бастайды. Әсіресе қараша айынан бастап қызығушылық өседі, ал мерекеге бір апта қалғанда ең жоғары деңгейге жетеді. Мәселен, адвент-күнтізбелер, әріптестерге сыйлықтар және сыйлық сертификаттары жиі ізделеді, деп жазады Egemen.kz. 

Yandex Ads өкілі Мадина Сейсенғалиеваның айтуынша, ел тұрғындары жаңа жыл қарсаңында «кімге не сыйлаймын, дастарқанға не қоямын, қайда барамын» деген жоспарлар құрады. 

Сыйлық ретінде сервистерге жазылым өте танымал. Желтоқсанда оған сұраныс артады: әсіресе мультижазылымдар, ойындарға жазылымдар және Telegram Premium жиі таңдалады.

Балалар үшін жаңа жыл – шырша тойы мен ертеңгілік. Сол себепті ата-аналар балаларға арналған іс-шараларды қазанның соңынан бастап іздей бастайды. Ал балаларға сыйлық іздеу желтоқсанның екінші аптасында ең жоғары деңгейге жетеді.

Тұрғындар қыста уақытты қызықты өткізу жолдарын да белсенді іздейді. Мәселен, мұз айдындарына, боулингке, караокеге сұраныстар қатты өседі.

Мерекелік дастарқанға арналған өнімдерге де қызығушылық көбейіп, азық-түлік пен дайын тамақ жеткізуге сұраныс артады. Әсіресе балық, теңіз өнімдері, тәттілер мен ет өнімдері көп ізделеді.

Тәттілер ішінде ақ шоколад, карамель, кәмпиттер, тәтті нандар мен вафли ең танымал. Сусындардан шай, кофе және шырындар жиі ізделеді.

Сыйлық ретінде адамдар көбіне электроника мен тұрмыстық техниканы таңдайды. Биыл 3D-принтерлер, саундбарлар, VR-көзілдіріктерге қызығушылық артқан. Сондай-ақ аэрогриль, стайлер және бу тазартқыштар жиі сатып алынады.

Ақылды гаджеттерге сұраныс екі есе өскен. Әсіресе «ақылды» колонкалар мен теледидарлар көп қаралады.

Жаңа жылда адамдар ерекше сыйлық алғысы келеді, бірақ қымбат затты таңдауға көп уақыт кетеді. Көпшілік интернетте бірнеше рет іздеп, бірнеше сайтты салыстырып барып шешім қабылдайды.

Үйді әсемдеуге арналған заттар да өте танымал: жасанды және тірі шыршалар, ойыншықтар, гирляндаларға сұраныс бірнеше есеге өседі. Сонымен қатар желтоқсанда косметика мен парфюмерияны да жиі іздейді – өзіне де, сыйлыққа да сатып алатындар көбейеді.