Жапония Қытайдың әрекетіне наразылық білдірді

АҚШ басты бәсекелесі Қытайды да ұмытқан жоқ. 

Бейжіңді жапонның әскери ұшақтарына бақылау орнатқысы келді деп айыптады.

Бұдан соң екі елдің арасындағы шиеленіс әрине одан сайын ушыға түсті. Аймақта қауіп туындап, арал тұрғындары алаңдай бастады.

Қытайдың әскери ұшақтары Жапонияның әскери әуе кемелерін бақылауға алып, олардың қозғалысын қадағалағаны мәлім болды. Бұл оқиға екі ел арасына сызат түсірді. Жапония Қытайдың бұл әрекетін қатерге  бағалап, ресми түрде наразылық білдірді. Ал АҚШ Жапонияның ұстанымын қолдап, Қытайдың әрекеті халықаралық құқық талаптарына қайшы деп айыптады. 

ЦИТАТА

АҚШ Мемлекеттік департаменті

- Біз Жапонияны толық қолдаймыз. Ынтымақтастығымыз жалғаса береді. Қытайдың мұндай қадамдары өңірдегі тыныштыққа қауіп төндіреді.

Вашингтонның мәлімдемесінен кейін Жапония билігі одақтас елдің қолдауын жоғары бағалады. Ал Қытай тарапы оқу-жаттығулар халықаралық талаптарға сай өтті, аймақтық қауіпсіздікке еш әсер еткен жоқ деп мәлімдеді.

Го Цзыкаун, Қытай Сыртқы істер министрлігінің өкілі:

- Жаттығулар халықаралық талаптарға толық сәйкес өтті. Барлық әрекеттер қауіпсіз орындалды. Жапонияның бұрмаланған мәлімдемелері негізсіз. Сондықтан халықаралық қауымдастық мұндай ақпаратқа назар аудармауға тиіс.

Аймақтағы шиеленістің ушығуына Жапония премьер-министрі Санаэ Такаичидің жақында жасаған мәлімдемесі әсер еткен. Ол Қытайдың Тайваньға қатысты ықтимал әрекеттері Жапонияның қауіпсіздігіне қауіп төндіруі мүмкін. Қажет болса Токио әскери шара қабылдауға дайын деп мәлімдеген еді. 

Санаэ Такаичи, Жапония премьер-министрі:

- Жапония мен Қытай арасында қиындықтар бар әрине. Біз бұл түйткілді мәселелерді шешіп, ынтымақтастықты арттыруымыз керек. Жапония Қытаймен диалог жүргізуге дайын. Біз есікті жапқанымыз жоқ. Бірақ біздің өз ұстанымымыз бар. Соған сүйене отырып, тиісті шешім қабылдаймыз.

Әзірге Жапония мен Қытай дегенінен қайтар емес. Әрқайсысы өз ұстанымдарын  дәлелдеп әлек. Анығы, бұл енді тек Бейжің мен Тайвань арасындағы мәселе ғана емес. Тынық мұхиты аймағындағы жаңа текетірестің басы болуы ықтимал.

Динара Орынтай