Жапония виза құнын соңғы 50 жылда алғаш рет қайта қарады

Жапония үкіметі шетел азаматтары үшін визалық алымдарды көтеруді мақұлдады. Жаңа тарифтер 1 шілдеден бастап берілген өтінімдер үшін күшіне енеді. Бұл 1978 жылдан бергі жапон визалары құнының алғашқы өзгерісі, деп хабарлайды Tengri Travel тілшісі The Independent-ке сілтеме жасап.

Жапония үкіметі шетел азаматтары үшін визалық алымдарды көтеруді мақұлдады. Жаңа тарифтер 1 шілдеден бастап берілген өтінімдер үшін күшіне енеді. Бұл 1978 жылдан бергі жапон визалары құнының алғашқы өзгерісі, деп хабарлайды Tengri Travel тілшісі The Independent-ке сілтеме жасап.

Министрлер кабинетінің шешіміне сәйкес, бір реттік виза құны бес есе - 3 000-нан 15 000 иенге дейін өседі. Көп реттік виза бағасы да бес есе: 6 000-нан 30 000 иенге дейін көтеріледі.

Жапония сыртқы істер министрі Тосимицу Мотэги қолданыстағы тарифтер жарты ғасырға жуық уақыт бойы қайта қаралмағанын айтты.

"Қазіргі визалық алым 1978 жылы белгіленген болатын, жақында біз оны сол уақыттан бергі инфляция мен валюта бағамдарының ауытқуын ескере отырып қайта қарастырдық", - деді ол баспасөз мәслихатында.

Ведомство басшысының айтуынша, шешім қабылдау кезінде түрлі фактор ескерілген.

"Біз бұл шешімді түрлі факторды мұқият зерделегеннен кейін қабылдадық және ол келушілер туризміне бірден әсер етеді деп күтпейміз", - деп атап өтті Мотэги.

Алым неге өзгеріп жатыр?

Визалық төлемдердің көтерілуі көші-қон жүйесінің ауқымды реформасының бір бөлігі болды. Өткен айда Жапония парламенті үкіметке иммиграциялық процедураларға байланысты алымдардың кең ауқымын қайта қарауға мүмкіндік беретін заңнамалық өзгерістерді мақұлдады.

Бұл елдегі шетелдік тұрғындар санының артуына байланысты қызмет көрсету шығындарының өсуін реттеу қажеттілігімен байланысты. Қосымша қаражатты көші-қон өтінімдерін өңдеуге, жапон тілін үйрену бағдарламаларын дамытуға және визалық режимді бұзумен, соның ішінде болу мерзімін асырып жіберумен күрес шараларын күшейтуге бағыттау жоспарланған.

Ресми деректер бойынша, 2025 жылдың аяғына қарай Жапониядағы шетелдік тұрғындар саны рекорд 4,13 миллион адамға жетті.

Өзгерістер тек визаға қатысты емес

Бұл төлемдерді көтерумен шектелмейді. Реформа аясында үкімет елде болу мерзімін ұзарту және резидент мәртебесін өзгерту үшін алынатын алымдардың шекті мөлшерін де айтарлықтай арттыруды көздеп отыр.

Мұндай төлемдер мөлшерін өтінім түріне қарай 10 000-нан 70 000 иенге дейінгі аралықта белгілеу ұсынылған.

Тұрақты тұруға рұқсат рәсімдеу құны да айтарлықтай өсуі мүмкін. Қазір тиісті алым 10 000 иен, алайда билік оны 200 000 иенге дейін көтеруді ұсынып отыр. Бұл өзгерістерді 2027 жылдың наурызында аяқталатын қаржы жылына дейін енгізу жоспарланған.

Сондай-ақ үкімет тарифтерді қайта қарағаннан кейін Жапонияның визалық және иммиграциялық алымдары басқа дамыған мемлекеттер деңгейіне жақындайтынын атап өтті. Ведомство өкілдерінің пікірінше, көптеген елде виза мен көші-қон құжаттарын рәсімдеу құны Жапонияға қарағанда әлдеқайда жоғары.

Тарифтердің көтерілуі иммиграциялық жүйе жұмысына жұмсалатын өсіп келе жатқан шығындарды қосымша бюджеттік шараларсыз ішінара өтеуге мүмкіндік береді деп күтіледі.

Бұл Қазақстан азаматтары үшін нені білдіреді?

Қазақстан азаматтары үшін Жапонияға бару тәртібі бұрынғысынша қалады. Қазақстандықтар сапардың мақсаты мен жоспарланған болу мерзіміне қарамастан, әлі де жапон визасын алуға міндетті.

Бұл ретте Жапонияның Қазақстандағы елшілігі арқылы Қазақстан және ТМД-ның басқа елдерінің азаматтары үшін жапондық кіру визасын рәсімдеу тегін.

Еске сала кетейік, туристік виза Жапонияда жұмысқа орналасу құқығын бермейді. Құжаттарда ескертулер болмаған жағдайда, өтінімді қарау әдетте құжаттар толық ұсынылғаннан кейін бес жұмыс күнін алады, алайда жекелеген жағдайларда мерзім ұзартылуы мүмкін.

Тағы оқыңыз: АҚШ паспортын алу қымбаттай түспек

Google News арқылы жаңалықтарымызды қадағалаңыз

Жазылу