Жапонияда туристер үшін сауда жасау ережелері өзгереді

Жапония шетелдік туристерге салықты қайтару ережесін өзгертеді. 2026 жылғы 1 қарашадан бастап саяхатшылар тауарды тұтыну салығын ескере отырып сатып алып, оны елден шығар кезде қайтаруы тиіс. Бұл жаңашылдық билікке салықсыз сатып алынған тауарларды қайта сатумен күресуге көмектеспек, деп хабарлайды Tengri Travel.

Не өзгереді?

CNA мәліметінше, қазір шетелдік туристер Жапонияда мөлшерлемесі 10 пайыз болатын тұтыну салығынсыз белгілі бір тауарларды сатып ала алады. Ол үшін Tax Free бағдарламасына қатысатын дүкенге жүгіну қажет.

1 қарашадан бастап жүйе өзгеше жұмыс істейді: сатып алушылар тауардың толық құнын төлейді, содан кейін елден шығар алдында салықты қайтаруды рәсімдейді.

Жаңа жүйе кеден қызметтеріне сатып алынған заттардың Жапониядан шығарылып жатқанын тексеруге мүмкіндік беретіні атап өтілді. Бұл тауарды салықсыз сатып алып, ел ішінде қайта сату схемаларына тосқауыл болуы тиіс.

Жаңа ереже туристерге қалай әсер етеді?

Жаңа ережеге байланысты туристер ұшар алдында қосымша рәсімнен өтуге мәжбүр болады. Бұл әуежайда күту уақытын ұзартуы мүмкін, әсіресе тексеру пункттері мен салықты қайтару терминалдарында кезек пайда болған жағдайда.

Токио кеден қызметінің мәліметінше, Ханеда, Нарита және Кансай сияқты кейбір ірі әуежайларда рәсімнің бір бөлігін онлайн режимде өтуге болады. Дегенмен, кеденшілер жолаушылардан сатып алынған тауарларды көрсетуді бәрібір талап етуі мүмкін.

Енді туристер бірнеше жайтты ескеруі керек:

барлық қажетті рәсімді, соның ішінде тауарды ықтимал тексеруді рейске отырғызу аяқталғанға дейін өту қажет. жүкті тапсырғаннан кейін оны тексеруге қайта алу мүмкін болмайды. Турист Жапониядан алып шыға алатын тауарларды ғана салықсыз сатып алуға рұқсат етіледі. кеденшілер әрбір чек бойынша сатып алынған заттарды жеке- тексереді. Егер турист чектегі ең болмағанда бір тауарды көрсете алмаса, оған сол сатып алған заты үшін салықты қайтарудан бас тартылуы мүмкін.

Осылайша, туристерге тексеруге алдын ала дайындалып, ұшар алдында барлық рәсімнен өтіп үлгеру үшін әуежайға ертерек барған дұрыс.

Жаңа ереже 2026 жылдың 1 қарашасынан бастап күшіне енеді.

Айта кетейік, бұған дейін 2026 жылы Жапонияға виза алуға қатысты қазақстандықтарға арналған нұсқаулық дайындаған едік.

Тағы оқыңыз: “Алматыдағы бағамен шамалас“: қазақстандықтар Жапонияға сапар алдындағы лайфхактарын бөлісті

Бізді Google-дың негізгі дереккөздер тізіміне қосыңыз

Қосу