Жаппай тарап жатқан вирустан қалай емделеміз?

Қазір елімізде тұмау мен түрлі вирустық инфекциялар белең алып тұр. Мамандар, әдетте мұндай вирустық толқын қазаннан наурызға дейін жалғасатынын айтады. Себебі бұл кезеңде жылы ауа райы салқын лепке ауысып, балалар мен ересектер басым уақытын жабық нысандарда өткізеді. Өз кезегінде жүйелі түрде таза ауамен тыныстамау да ағзаның вирустардан қорғану әлеуетін әлсіретіп жібереді, деп жазады Egemen.kz.

Ауырмаудың амалы

Халық нақылы «ауырып ем іздегенше, ауырмайтын жол іздеудің» қамын ойлауға үндейді. Бүгінде дәрігерлер ауырмайтын амалдың бірі уақытылы екпе алу екенін алға тартады. «Керуен-Medicus» мекемесінің дәрігер-инфекционисті Амангүл Изимова екпе алу ауруды болдырмаудың амалы ғана емес, вирусты жеңіл өткізуге сеп екенін де түсіндірді.

«Тұмауға қарсы вакцинаны қыркүйек-қараша аралығында салдырған дұрыс. Әсіресе балалар, қарттар, жүкті әйелдер және созылмалы ауруы бар адамдар бұл мәселеге бей-жай қарамауы тиіс. Вакцина ауырмауға 100% кепілдік бермесе де, ауруды асқынудан қорғайды және ауырсынуды жеңілдетеді», деген дәрігер вирустан қорғану үшін қарапайым әрі маңызды ережелерді де ұстануды ұсынды.

«Осы қатардағы ереженің алғашқысы қолды  жиі жуу, ұдайы антисептик қолдану болса, үйде немесе жұмыс орнында бөлмені жиі желдетуді де қаперде ұстау маңызды. Біздің қоғамда ауру симптомдары сезілгеннен медициналық маска тағу әдебі қалыптаспаған. Медициналық маска тағу ұят емес, жақын-жуық, әріптес-дос алдындағы жауапкершілік екеніне баса назар аударғым келеді. Ауырмау үшін иммунитетке қолдау көрсету де ұмыт қалмауға тиіс. Ол үшін дұрыс тамақтану, уақытылы ұйықтау сынды қарапайым мәселелерге көңіл бөлген жөн», деді Амангүл Изимова.

Маман вирус өршіп тұрған тұста адам көп жиналатын қоғамдық және ойын-сауық орталықтарына бармауға да кеңес береді. Ал ауыра қалған жағдайда ем-шараны сауатты жүргізу әрі неғұрлым ертерек бастау шарт екенін жеткізді.

«Ауырған азаматтар дәрігерге жүгінбей-ақ емді антибиотик ішуден бастап жататынын тәжірбиемізде жиі кезіктіреміз. Науқастар арнайы тәртіп болмаса антибиотик вируспен күресте қауқарсыз екенін ескермейді. Өз бетімен тағайындалған антибиотик басқа ағза мүшелеріне зиян келтіруі де ықтимал. Сондықтан бірінші кезекте маман кеңесіне жүгіну құпталады. Ал бала не ересек болсын дене қызуы көтерілсе, жөтел жиілеп, бойды әлсіздік басса ойланып отырмай маман алдына баруы тиіс. Дәрігер тағайындаған еммен қатар көп мөлшерде сұйықтық, жылы су ішу, сапалы тынығуды да есте сақтаған абзал», деді «Керуен-Medicus» мекемесінің дәрігер-инфекционисті.

Ауруханалардағы ахуал қандай?

Вируспен күрес, ауырмаудың жолы туралы негізсіз сөз қозғап отырғанымыз жоқ. Жоғарыда атап өткеніміздей елімізде қараша айының басынан ЖРВИ жұқтырып, тұмау болған науқастардың қатары қалыңдаған.

Мәселен, елордадағы ересектерге арналған Астана қаласы әкімдігінің Қалалық инфекциялық орталығында кейінгі 3 күнде ЖРВИ және тұмау диагнозымен ауруханаға жатқызылғандар саны артқан. 7 қарашадағы мәлімет бойынша, аталған мекемеде 353 пациент, оның ішінде 243 бала ем алып жатыр. Ал бірінші медициналық-санитариялық көмек (БМСК) ұйымдарында 2043 пациент, оның ішінде 1061 балаға ЖРВИ мен тұмауға қарсы амбулаторлық ем жүргізіліп жатыр. Сондай-ақ 376 пациентке пневмония диагнозы қойылған, оның ішінде 273-і бала екен.

Ауруханада апта жатқандардың арасында Айна Серікқызының ұлы мен қызы да бар. Ауру белгілері, әуелі Айнаның 4 жасар қызында байқалған. Бастапқыда әлсіреп белсенді қимыл қозғалысы азайған бүлдіршіннің келесі күні қызуы көтеріліп, оңайлықпен түспеген.

«Жасыратыны жоқ, бастапқыда балалы үйде болатын дәрі-дәрмекпен қызуды түсіруге әрекет жасадық. Әдетте бір рет қабылданған сироптан кейін түсетін қызу бұл жолы бой бермеді. Баламның жалпы жағдайы көз алдымда нашарлай түсті. Тамаққа тәбеті болмай, тіпті су ішуден қалған соң ауруханаға апардық. Сол аралықта қызымдағы симптомдар ұлымда да біліне бастады», дейді астаналық тұрғын.

Айна балаларын ауруханаға жеткізгенде, ауру денені меңдеп алғаны анықталған. Сондықтан дәрігерлер қос құлыншақпен, анасын ауруханада жатқызып емдеуді ұйғарған.

«Балаларға арналған қалалық инфекциялық аурухана ұл-қызыма жедел медициналық көмек көрсетті, дұрыс ем тағайындады. Ем үшінші күн дегенде әсер етіп, балаларымның беті бері қарай бастады. Сондықтан ата-аналарға баладағы бар белгіге жете көңіл бөлуін сұраймын. Қазір өршіп тұрған вирусты үйде емдеу қиын. Аурудың жазылып кетуін күтпей емханаға жүгіну жағдайды ушықтырмайтына көзім жетті», деді Айна Серікқызы.

Астана қалалық Денсаулық сақтау басқармасы қала бойынша маусымдық вирус кезеңінде ауруханаларда алдын ала 4160 төсек-орын дайындаған. Вирус жұқтырғандар саны көбейген тұста, емханалардағы төсек-орын саны 4519-ға арттырылған. Басқарма бүгін 4519 орынға да науқастар жайғастырылғанын, олардың саны артса қосымша төсек-орындар ашу жоспарланып отырғанын жеткізді.