Жастардың белсенді болуы ел болашағы үшін маңызды сарапшылар пікірі

Студия қонақтарының бірі – Сенат депутаты Евгений Больгерт. Ол әрбір азаматтың өміріне тікелей әсер ететін өзекті заңнамалық мәселелер мен мемлекеттік бастамалар туралы пікір білдірді.

Әңгіме тек қазіргі заң жобасымен шектелмей, ел дамуының стратегиялық бағыттарын да қамтыды. Спикер жаңа нормалардың әлеуметтік салаға, экономикаға және мемлекеттік басқару жүйесіне ықпалы жөнінде жан-жақты түсіндірді. Сондай-ақ құқықтық мәдениетті дамыту және заңнамалық өзгерістерді талқылауға қоғамды кеңінен тарту қажет екенін атап өтті.

Эфир барысында азаматтық жауапкершілік пен саналы таңдау жасау мәселесі де талқыланды. «Ассамблея жастары» РҚБ төрағасы Тимур Жұмырбаевтың айтуынша, бүгінде жастардың дауыс беруі тек өздері үшін ғана емес, тұтас мемлекет үшін де маңызды факторға айналып отыр.

– Азаматтардың өз жауапкершілігін терең түсініп, дауыс берудің маңызын сезіне бастағаны қуантады. Әсіресе бұл жас ұрпақ үшін аса қажет. Дауыс беру кезінде саналы таңдау жасау олардың жеке өмірі мен кәсіби бағытын ғана емес, тұтас қоғамның дамуын да айқындайды, - деді ол.

Сондай-ақ Jibek Joly Radio мобильді студиясында Amanat партиясының хатшысы Александр Данилов сұхбат берді. Спикер партияның негізгі бастамалары, ел дамуының жаңа бағыттары сынды өзекті мәселелерге тоқталды.

– Жаңа буын өмірдің мәнін іздеуге көбірек ұмтылады, сондықтан олардың нақты құндылықтары болған жөн. Дәл осы құндылықтар жөніндегі сұрақтарға жауап іздеу барысында олар азаматтық және саяси пікірталастарға қатысады. Анық айтсақ, олардың белсенділігі тек арта береді, және біз оны барынша қолдауға тиіспіз. Өз пікірін ашық білдіріп, қоғамдық өмірге белсенді араласатын азаматтар неғұрлым көп болса, бұл еліміздің дамуына соғұрлым оң әсер етеді, - деді Александр Данилов.

Айта кетейік, Jibek Joly радиосында әйелдердің қоғамдағы көшбасшылық рөлі жайында Мәжіліс депутаты Қарақат Әбден де сұқбат берді.