Жетісуда 14 млрд теңгеге құс фабрикасы салынады

АСТАНА, 5 қараша – Sputnik. Жетісу облысында "Beles Agro KZ" ЖШС құс етін өндіретін зауыт салады. Бұл туралы өңір басшысы Бейбіт Исабаевтың Көксу ауданының тұрғындарымен кездесуі барысында айтылды, деп хабарлайды облыс әкімінің баспасөз қызметі.

Бейбіт Исабаев "Beles Agro KZ" ЖШС жылына 15 мың тонна құс етін өндіретін инвестициялық жобаны қолға алғанын атап өтті.

"Біздің мақсатымыз – ауданда өндірілген өнімді қайта өңдеу үлесін көтеру. Бұл бағытта бірқатар жұмыс жүргізіліп жатыр. Атап айтқанда, ақпан айында тәулігіне 40 тонна сүт өнімдерін өндіретін "Green Horizon Enterprises" цехы іске қосылды. Сондай-ақ құны 14 млрд теңге болатын "Beles Agro KZ" ЖШС-нің құс етін өндіретін жобасы жүзеге асырылып жатыр", - деді Исабаев.

Осы орайда өңір басшысы аудан әкіміне тиісті басқармалармен бірлесіп, өңдеу саласына инвестиция тарту жұмысын күшейтуді тапсырды.

Айта кетері, биылғы тоғыз айда Көксу ауданының экономикасына 13,6 млрд теңге инвестиция тартылған.

Ауданда ауыл шаруашылығы тауарларын өндіруге үлес қосып, азық-түлік қауіпсіздігін қамтамасыз етіп отырған үш ірі кәсіпорын бар. Атап айтқанда, оның алғашқысы бүгінгі күні шикізат қабылдау және өңдеу жұмыстарын жүргізіп жатқан Көксу қант зауыты болса, екіншісі майлы дақылдарды өңдейтін "Уыз Май Индастри" ЖШС, қазіргі кезде серіктестік 10,5 мың тонна майбұршақ қабылдап, оның 2,2 мың тоннасын қайта өңдеуден өткізді. Ал үшіншісі – Еңбекшіқазақ ауылындағы "Көксу СМ" сүт зауыты ("Арқабаев" ЖК). Кәсіпорын жылына 12 мың тонна сүт өңдейді. Шикізатты Көксу, Кербұлақ, Ескелді аудандарынан алады.