Жезқазғанда спорт академиясы ашылады

Жезқазғанда балалар мен жасөспірімдер спорт академиясы бой көтерді.

Инвесторлар қаржысына салынған орталық келер аптадан бастап оқушыларды қабылдайды. Мектеп-интернат форматында жұмыс істейтін мекеменің  дайындығымен Парламент Мәжілісінің депутаттары Ерболат Сатыбалды және Аманжол Әлтай танысты. Академияда мамандандырылған күрес және жаттығу залдары бар. Бұдан бөлек оқушылар гимнастика, волейбол, баскетбол және үстел теннисі секілді спорттың бірнеше түрімен шұғылданады. Академияға негізінен шалғай ауылдарда тұратын спортқа икемі бар жастар қабылданады. Қазірдің өзінде облысқа қарасты ауылдар мен көршілес Қостанай облысының Арқалық қаласынан 150-ден астам бала іріктелді. Мұнда оларға жатын орын, бірнеше мезгіл тамақ және спорттық киімдер тегін беріледі. Жалпы, өңірде соңғы жылдары спорт инфрақұрылымы қарқынды дамып келеді. Облыс құрылғалы 50-ден астам нысан ашылды. Соның нәтижесінде тұрғындарды бұқаралық спортпен қамту көрсеткіші 37 пайызға жетті.

Аманжол Әлтай, ҚР Парламенті Мәжілісінің депутаты:

- Мықты спортшыларды дайындау әліппесі осындай мектептерден басталады. Сондықтан біз Астана мен Алматы ғана емес, осындай өңірлердегі спортты дамытудың керемет бір жүйелі түрдегі  қолға алынған шараның бірі деп есептейміз. Әсіресе ауыл-ауылдан келетін мықты балаларымыз осы жерде тамақтану тегін, жатар орны, барлық жағдайы жасалған екен.