Жоғалып кеткен алып тасбақалар 180 жылдан кейін Галапагос аралдарына қайта оралды

Спутниктік деректердің көмегімен мамандар аралдың қай аймақтары тасбақалар үшін ең қолайлы екенін анықтаған. Негізгі факторлар – өсімдік жамылғысы, ылғалдылық деңгейі және ұя салуға қолайлы орындар. Галапагос ұлттық саябағының басшылығы 20 ақпанда популяцияны қалпына келтіру мақсатында Флореана аралының екі аймағына 158 алып тасбақаны жіберді.

Тасбақалар бұл өңірден XIX ғасырдың ортасында жойылып кеткен. Оған кит аулаушылар, сондай-ақ шошқалар мен егеуқұйрықтардың олардың жұмыртқаларын жеп қоюы себеп болған. Тасбақалар жоғалғаннан кейін аралдың табиғи ландшафты да өзгеріске ұшыраған.

Алып тасбақаларды қайта жіберу – арал экожүйесін қалпына келтіруге бағытталған ауқымды жобаның бір бөлігі. Мамандар егеуқұйрықтар мен жабайы мысықтар сияқты инвазиялық түрлерді жоюды және жергілікті жануарларды қайта оралтуды жоспарлап отыр.

«Тасбақалардың аралға оралуы – маңызды оқиға. Соңғы рет оларды мұнда Чарльз Дарвин көрген», деп келтіреді жобаның жетекші зерттеушілерінің бірі Джеймс Гиббстің сөзін The Guardian басылымы.

Айта кетейік, Қазақстанда сирек кездесетін жануарлар тізіміне тағы 11 түрі енгізілмек.