Жолаушылар мінген ұшақ ұшуға дайындалып жатқан, бірақ бірдеңе дұрыс болмады

Лимадағы Хорхе Чавес атындағы халықаралық әуежайда Пиура қаласына ұшуы тиіс LATAM Airlines әуекомпаниясының ұшағы өртенді. Өрт ұшар алдында сол жақ қозғалтқыш пен қанат тұсында болған. Жолаушылар эвакуацияланып, рейс тоқтатылды, деп хабарлайды Tengri Travel.

Бортта не болды?

Trome мәліметінше, оқиға 19 қазанда Лимадан Пиураға бағытталған LA2302 рейсінде болған.

Ақау ұшақ әуеге көтерілмей тұрып анықталған. Әуе кемесінің командирі дауыс күшейткіш арқылы жолаушыларға хабарласып, сол жақ шасси тірегіне байланысты техникалық ақау шыққанын айтқан. Ұшуды тоқтатуға тура келді, ал экипаж жолаушылардан сабыр сақтап, қауіпсіздік нұсқауларын орындауды сұраған.

Көп ұзамай ұшақтың сол жақ қозғалтқышы мен қанаты тұсында өрт басталды. Оқиға орнына әуежайдың апаттық қызметтері келді.

Желіде жарияланған видеоларда ұшақтың сыртындағы өрт көрінеді. Басқа кадрларды жолаушылардың бірі иллюминатор арқылы түсіріп алған.

#BREAKING Лима әуежайынан түскен таңғаларлық кадрлардан LATAM Peru компаниясының Airbus A320ceo ұшағының қозғалтқышынан шыққан өртті көруге болады. Жалын сонымен қатар ұшақтың дөңгелегі мен қанаттарына да тиген. Қазіргі уақытта зардап шеккендер туралы ақпарат жоқ @OnDisasters https://t.co/Rzir7dTAVx

— AEROIN (@aero_in) 19 қазан, 2026 жыл

Қауіпсіздік мақсатында жолаушылар ұшақтан эвакуацияланды.

Оқиғадан кейін LATAM компаниясы LA2302 рейсінде техникалық ақау болғанын растады.

Компания өкілдері адамдарға көмек көрсетіліп жатқанын және олардың сапарын тезірек жалғастыруы үшін басқа рейстерге ауыстыру ұйымдастырылып жатқанын мәлімдеді.

Жолаушылардың айтуынша, эвакуациядан кейін оларға басқа ұшақпен ұшу ұсынылған.

Өрттің шығу себептері әлі анықталып жатыр. Оқиғаның мән-жайы техникалық тексеру барысында зерттелуі тиіс.

Әуежай әкімшілігі оқиғадан кейін әуе айлағы әдеттегі режимде жұмысын жалғастырғанын хабарлады.

Тағы оқыңыз: Өртенген пауэрбанк Lufthansa ұшағын шұғыл қонуға мәжбүр етті

Бізді Google-дың негізгі дереккөздер тізіміне қосыңыз