Жұмыс істеп тұрған шамдарды неге ауыстырады? : Алматы әкімдігінің жауабы

Алматы тұрғындары Сәтбаев көшесіндегі жұмыс істеп тұрған шамдардың неге ауыстырылып жатқанына наразылық білдірді. Әкімдік өкілдері Tengrinews.kz тілшісіне бөлшектелген тіректер қайда жіберілетінін және жарықтандыруды жаңғыртудың мақсатын түсіндірді.

"Бұрынғы шамдардың несі ұнамады?"

Алматы тұрғыны Threads желісінде жазба жариялап, Сәтбаев көшесіндегі істеп тұрған шамдарды ауыстырудың орындылығына күмән келтірді.

"Қолданыстағы шамдардың несі ұнамады? Алматыда Сәтбаев көшесіндегі шамдарды неге екені белгісіз ауыстырып жатыр. Көшенің келесі бетінде олар жанып тұр. Шамасы, жарықдиодты болса керек, демек олар энергия үнемдегіш. Жаңасын жасап шығаруға, ескі әрі жұмыс істеп тұрғандарын алып тастап, жаңасын орнатуға қанша қаражат жұмсалады?" - деді жазба авторы.

Скриншот/Тhreads

Алматы қаласының Қоғамдық кеңістіктерді дамыту басқармасы жарықтандыруды ауыстыру жұмыстары Сәтбаев көшесінің Байзақов көшесінен Луганский көшесіне дейінгі бөлігін кешенді абаттандыру аясында жүргізіліп жатқанын хабарлады.

"Жоба аясында қаланың бірыңғай сәулеттік стилі мен абаттандыру стандарттарына сай келетін жаңа тіректерді орнату арқылы сыртқы жарықтандыруды жаңғырту қарастырылған. Осындай тәсіл Республика алаңында және қаланың басқа да реконструкциядан өтіп жатқан көшелерінде қолданылады, бұл қоғамдық кеңістіктердің бірыңғай сәулеттік келбетін қалыптастыруға мүмкіндік береді", - деп нақтылады басқарма өкілдері.

Баспасөз қызметі пайдалануға жарамды бөлшектелген тіректер тасталмайтынын айтты. Олар көше жарығы жетіспейтін қала учаскелеріне қайта орнатылады.

"Атап айтқанда, Сәтбаев көшесін реконструкциялау аясында алынған тіректер "Алматы Қала Жарық" мекемесіне, сондай-ақ Медеу ауданы әкімінің аппаратына берілді. Қазіргі уақытта бұл тіректер Медеу ауданындағы Қайсенов көшесінде сыртқы жарықтандыруды ұйымдастыру үшін қайта пайдаланылып жатыр", - деп атап өтті ведомство.

Басқарма ескі тіректердің жаңа шамдар орнатылып, іске қосылғаннан кейін кезең-кезеңімен алынатынын нақтылады. Бұл жөндеу жұмыстары жүріп жатқан учаскелерде жарықтың сақталуын қамтамасыз етеді.

Тағы оқыңыз: Алматы-1 вокзалындағы аялдамалар бұзылып жатыр: әкімдік себебін түсіндірді

Бізді Google-дың негізгі дереккөздер тізіміне қосыңыз