Жүргізуші 12 жастағы қызды қағып, өзі қашып кеткен

Алматыда Есенәлиев көшесінде күндізгі сағат 16:00 шамасында 12 жастағы қызды көлік қағып кеткені хабарланды. Оқиға жаяу жүргіншілер өткелінде болған. Баланы қағып кеткен жүргізуші көлігін тастап, оқиға орнынан бой тасалаған, деп жазады Egemen.kz.

Фото: ЖИ

Алдын ала деректерге қарағанда, оқиғаға қатысы бар көлік – Hyundai Accent маркалы автомобиль. Қазір полицейлер күдіктіні анықтау және ұстау бойынша іздестіру шараларын жүргізіп жатыр.

«Іздеу жұмыстарына әкімшілік полиция басқармасының қызметкерлері жұмылдырылды. Ол міндетті түрде ұсталып, жауапкершілікке тартылады», деді полиция өкілдері.

Қыз балаға алғашқы медициналық көмек көрсетіліп, ауруханаға жатқызудың қажеті болмаған. Оқиғаның мән-жайын Бостандық аудандық полиция басқармасы тексеріп жатыр.